P.7M Shabu Nasakmit

CEBU, Philippines - Mokabat sa P714,000 nga kantidad sa ginadiling drugas ang nasakmit sa buy-bust operation sa Provincial Intelligence Branch (PIB) sa milabay’ng adlaw diha sa dakbayan sa Lapu-Lapu ug lungsod sa San Fernando.

Ang operasyon gipangulohan ni Superintendent Rodolfo Albotra misikop kang Lester Manloloyo sa sitio Luknay, sa barangay South Poblacion, lungsod sa San Fernando niadtong Sabado sa gabii.

Nakuha gikan kang Manloloyo ang duha ka medium nga pakete sa gidudahang shabu nga gibana-banang mokantidad tanan og P14,000, usa ka kalibre .45 nga pistola nga dunay tulo ka mga buhing bala, usa ka kolor itom nga Yamaha Meo nga motorsiklo nga nagtangag sa plakang 7LK-579 nga gituohang maoy gamiton sa suspetsado sa ilegal niining kalihukan.

Samtang kagahapon sa hapon human sa gihatag nga impormasyon ni Manloloyo nasikop sa grupo ni Albotra si Allan Ligara sa barangay Gun-ob, dakbayan sa Lapu-Lapu.

Si Ligara nakuhaan og duha ka bultong shabu nga gibana-banang mokantidad tanan og P700 mil, usa ka Honda Wave nga motorsiklo nga nagtangag sa plakang IK-4401, cellphone ug papel nga gisulod sa usa ka container.

Si Chief Inspector Mark Gifter Sucalit, deputy si PIB nagkanayon nga si Manloloyo gipanid-an sulod na sa usa ka buwan. Samtang si Ligara maoy sinaligan sa usa ka level one nga drug pusher sa dakbayan sa Sugbo.

Ang nahisgutang level one nga drug pusher sa nahipos nga report sa kapolisan mohalin kini og P350,000 nga kantidad sa drugas matag semana ug padayon karon nilang gipanid-an.

Ang duha temporaryong nadetiner sa Consolacion Police Station detention cell.   - BANAT NEWS