Pagbuwag sa Olango sa Lapu' tun-an

CEBU, Philippines - Tun-an sa magtiayong Radaza ang tinguha sa mga taga Isla sa Olango nga mamahimong buwag nga munisipalidad.

Kini ang giluwatang pamahayag ni Lapulapu City Mayor Paz Radaza atol sa iyang pakigpulong sa mga kadagkoan sa Philippine Air Force sud sa Mactan Benito Ebuen Air Base (MBEAB) atol sa ika-113 nga anibersaryo sa kaugalingnan o Independence Day sa nasud.

Matud pa ni Radaza iyang tun-an uban sa iyang kapikas nga si Lapulapu City Lone District Congressmen Arturo “Boy” Radaza ang giluwatang manifesto sa mga barangay kapitan sa Isla sa Olango nga mahatagan og higayon nga sila mamahimong usa ka munisipalidad.

Nakita ni Radaza nga sa maong paghatag og “Independence” sa maong isla posibleng molambo ang ekonomiya niini gumikan kay makalihok na kini nga dili magsalig sa dakbayan sa Lapulapu.

Samtang ang mga opisyal sa PAF nalipay sa presensiya ni Mayor Radaza atol sa ilang pagselebrar sa kagawasan sa nasud diin matud pa ni Brig. Gen. Raul Dimatatac ang Base Commander sa MBEAB.

Matod pa ni Dimatatac nga ang PAF mobarog gyud aron protehian ang katawhan ug kagawasan niini.

Human sa pakigpulong misunod usab ang kalayaan caravan diin ginuntan kini og mga tinun-an ug magtutudlo sa departamento sa edukasyon palibot sa dakbayan sa Lapulapu hangtod na sa City hall.  - BANAT NEWS