CEBU, Philippines - Nadakpan sa kapolisan ang usa ka tawo nga suspetsado sa pagpanglugos sa 35-anyos nga babaye nga giingong naangol tungod sa pagdakdak niini og bato alas-9 pasado ang takna sa miaging gabii sa Manhatan, barangay Pajac, dakbayan sa Lapulapu.
Ang nadakpan ug kasamtangan karong gibalhog sa bilanggoan mao si Jeonard Jamulos, 23, nagtrabaho isip pintor sa maong dapit, siya gidakop sa mga tanod sa barangay Pajac ug mi-turnover kaniya sa Lapulapu City Police Office.
Ang biktima dali nga gihatod sa mga barangay tanod sa tambalanan ug padayon nga giatiman sa mga doktor tungod sa samad sa ulo ug mga pangos sa kalawasan ug gidudahan usab nga nalugosan kini sa suspek.
Ang suspetsado nga nahinabi sa Banat News hugtanong mihimakak nga iyang gilugos ang biktima apan miangkong iyang gihapak og bato ug gipatidpatiran ang biktima.
Nangangkon ang suspek nga wala niya tuyoa ang nabuhat ngadto sa biktima sanglit nakuratan siya sa kalit nga pagbutho niini sa iyang atubangan samtang nagguroy sa iyang naguba nga motorsiklo maong iyang nahapak ug napatid-patiran. (BANAT NEWS)