Gwen midaob sa 3 mil ka marijuana

CEBU, Philippines - Mikabat sa 3 mil kapin ka punoan sa marijuana ang gipangunayan og daob ni Gobernador Gwendolyn Garcia didto sa lungsod sa Badian sa miaging   Huwebes.

Uban sa gobernador sa pagsunog sa mga hamtong nang punoan sa ginadiling tanom mao si Cebu Provincial Police Office Director Patrocinio Comendador ug Badian Mayor Robert Librando ug uban pang mga opisyal sa lungsod.

Si Comendador mitambag sa mga Sugboanon nga likayan gayud ang paghithit og marijuana kay daku kaayo kini og ikadaot sa panglawas sa usa ka tawo.

Samtang si Mayor Librando usab nagkanayon nga nakadayeg kaayo siya sa walay puas nga paningkamot ni Gobernador Garcia sa pagpadayon sa kampanya batok sa illegal nga drugas kay bisan dili maayo ang dagan sa panahon mipadayon gyud kini sa pagbisita sa ilang lungsod aron sa pagsunog sa nahipos sa kapolisan nga marijuana.

Nagpasalmat siya sa gobernador kay bisan og babaye abtik   kaayo kining moresponde sa mga dagkung problema dili lang sa ilang lungsod kundili sa tibuok probinsya sa Sugbo.

Sa bahin sa gobernador, padayon niyang giawhag ang kapolisan, militar ug ubang mga ahensiya sa kagamhanan sa pagtabang sa iyang administrasyon sa walay paglugak nga kampanya batok sa illegal nga drugas.(WC)  (BANATNEWS)