CEBU, Philippines - Daghang mga hulagway sa mga bata ang nakit-an diha sa sulod sa USB flash disk ni Bella Ruby Santos ang usa sa suspek sa pagdagit ug pagpatay sa 6-anyos nga si Ellah Joy Pique atol sa public viewing sa sulod niini kagahapon diha sa korte.
Apan walay bisan usa nga nakitang hulagway ang korte sa namatay’ng 6-anyos nga si Pique. Sa report sa TV Patrol Central Visayas si Santos nahibulong usab nganong adunay mga litrato sa mga bata sa maong USB ug miingon nga dili iya kondili sa iyang computer technician nga usa ka Robert Presbitero ang tag-iya niini ug posibleng nabiyaan sa ilang balay.
Atol sa viewing ang freelance IT specialist nga si Leo John Oliveros, 30, nga usa ka computer engineering maoy gikuha ni Executive Judge Meindrado Paredes aron moabli sa maong USB.
Sa dihang gihimo na ang pormal nga pagsusi sa flash disk didto nakita ang pipila ka dokumento susama sa resume, letter, mga hulagway sa mga batan-ong lalaki ug babaye ug kabataan ug lay out frames. Samtang ang ubang files sa maong fish disk wala maablihi kini tungod kay nagkinahanglan pa usab og software.
Tungod sa kakulang sa oras ug tungod usab sa mga softwares nga gikinahanglan pa nga e-install gimando sa korte nga padayonon kini karong Hulyo 11 ning tuiga.
Sa wala pa gipahigayon ang public viewing, si Paredes mipahimangno nga ang tanang files nga anaa sa USB iyang ipakita aron ang duha ka partido matagbaw niini.
Samtang iya usab nga gipahimangnoan si Oliveros nga kun ugaling adunay ‘sex scene’ laktawan kini dayon tungod kay wala man kini kalabotan sa maong kaso.
Si Atty. Rameses Villagonzalo, ang abogado ni Santos nagkanayon nga base sa gibutyag nagpakita lang nga wala gyuy magamit nga ebidensya batok sa iyang kliyente diha sa maong USB tungod kay giingong ang uwahing entry niadto pang Disyembre. Nahitabo ang krimen sa bulan na sa Pebrero.
Apan si Atty. Inocencio Dela Cerna ang abogado sa CIDG-7 nagkanayon sa report sa Balitang Bisdak kagahapon nga “namumo” ang kampo ni Santos tungod sa nahauna nilang pamasangil nga gi-tamper sa CIDG ang USB.
Samtang gipahibalo ni Dela Cerna nga gibutang na sa watchlist order si Bella Ruby Santos ug iyang uyab nga Briton nga suspek usab sa maong krimen nga si Ian Charles Griffiths nga dili na makabiyahe sa gawas sa nasud.
Sa laing bahin, gibasura usab ni Paredes ang mosyon nga gisang-at ni Santos kalabot sa pagsunog o pagputol-putol sa mga CD covers, ang pagtan-aw sa USB ug video camera tungod kay human na man nasabotan sa duha ka partido nga adunay ipahigayong public viewing.
“The motion filed by the respondent to view items found inside the body of Ellah Joy may be only if there is trial on the merits or in connection with any preliminary investigation,” pasabot pa ni Paredes. Samtang mimando usab si Paredes sa kampo sa Criminal Investigation and Detection Group nga ipa-turnover ngadto sa korte ang mga butang nga gihisgutan ni Santos sa iyang mosyon. (BANATNEWS)