Sikyu mium-om sa armas naghikog

CEBU, Philippines - Human sa panaglalis sa iyang asawa, usa ka gwardya ang napalgang patay sulod sa iyang lawak human giingong nagpusil sa iyang kaugalingon kagahapon sa alas-12 sa udto diha sa Maria Theresa Village sa barangay Guadalupe siyudad sa Sugbu.

Ang naghikog mao si Wilijado Tagapan,58, nagpuyo sa nahisgutang lugar kinsa mium-om sa sumbohan sa armas dayong kablit sa gatilyo niini hinungdan nga milapos ang bala sa iyang tangkugo.

Ang mga sakop sa Homicide Section sa Cebu City Police Office walay nakit-ang timailhang may nahitabong komosyon sulod sa lawak nga posibling maoy hinungdan sa kamatayon ni Tagapan.

Ang asawa nga si Editha,61, mitug-an sa kapulisan nga nagkalalis sila sa iyang bana sa wala pa mahitabo ang insidente, apan giingong nianang pagkagabii iyaha pa gyud kining giagda og pangaon.

Matud sa asawa ang iyang bana usahay mangigi sa dinad-an ngadto sa ilang mga anak ug mga apo. Ang magtiayon walay anak apan pulos sila dunay anak sa lain sa wala pa sila magminyo.

“Magselos lagi na siya usahay kay kuno gipalabi na nako akong anak ug apo,” matud pang Editha.

Siya mitug-an nga duna siyay unom ka anak samtang si Wilijado dunay upat sa unang asawa apan ang tanan wala magpuyo sa ilang balay gumikan kay pulos naman naminyo.

Si Wilijado sakop sa Ropeza Security Agency ug nadestino sa usa ka banko diha sa Natalio Bacalso Avenue.

Ang mga sakop sa Crime Scene Investigation (CSI) sa Cebu City Police Office (CCPO) nakarekober usa ka botelya sa ilimnong makahubog sulod sa kwarto ni Wilijado ug nagtuo ang kapulisan nga nag-inom kini daan sa wala pa siya magpusil sa iyang kaugalingon.

Si Editha diha sa ilang sala sa dihang nadunggan niini ang lanog nga buto sa armas hinungdan nga gisusi dayon ang kwarto ug iyang nakit-an ang bana nga nagkadugo na diha sa salog ug may pinusilan sa baba.

Samtang usa ka Rolando Cabalquinto, 48, sa sitio Panagsama barangay Basak San Nicolas siyudad sa Sugbu napalgan sa iyang anak lalaki nga naghikog pinaagi sa paghigot og pisi sa iyang liog sulod sa ilang pinuy-anan.

Si Jobert Cabalquinto, anak sa naghikog misaysay sa mga sakop sa Homicide Section nga gikan siya sa eskuylahan ug sa iyang pag-abot iyahang gipangita ang amahan apan nakugang nalang siya nga nagbitay na kini ug patay na. (BANATNEWS)