CEBU, Philippines - Ipaubos sa Transformation and Moral Recovery Program ang kapolisan nga nag-atubang og kasong administratiba sa tinguha nga mausab pa ang ilang kaugalingon.
Matud pa ni Deputy Provincial Director for operation sa Cebu Provincial Police Office, Supt. Teofilo Siclot nga ang tinguha sa maong programa mao lang ang pagreporma og balik sa ilang kapolisan.
“Some police are becoming politicized so we need to reform them through this program,” pasabot pa ni Siclot.
Midugang si Siclot nga ang Anabaptist Church maoy mopahigayon sa maong seminar apan ang module niini gikan sa Camp Crame.
“Dili man sila basta-basta lang sad motudlo kay gikan man sa Crame ang programs,” matud pa ni Siclot.
Lakip sa mga posibleng polis nga maapil sa maong programa mao silang PO2 Rommel Patalinghug ug PO1 Orland Condes sa Naga Police Station nga gipasanginlang nangulata og usa ka gwardiya niadtong Mayo 1.
Laing posibling malakip sa maong programa mao usab si PO2 Arnold Frenal nga gipasanginlang mimolestya og batan-on niadtong Abril 18 ug si PO2 Antonio Icalina sa Tudela Police nga gipusil sa lima ka wala mailhing tawo sa syudad sa Naga niadtong Mayo 21.
Samtang niadtong Dominggo, siyam ka polis ang nakadawat og pasidungog gikan sa Anabaptist Church isip kasaulogan nila sa ilang ika-24th anniversary sa maong simbahan.
Ang mga nakadawat og Outstanding Officers Award mao silang Supt. Anthony Bagarinao, hepe sa Balamban, Supt. Teofilo Siclot, Deputy Provincial Director for Operation (CPPO), Chief Insp. Bonifacio Garciano, hepe sa Theft and Robbery Section sa Cebu City Police Office, Supt. Rex Urbano, Regional Training Director sa Regional Training School, Insp., Gazbamiller Guzman sa 7th PCAS PNP Aviation Security Command, Sr. Supt. Noel Gillamac, hepe sa kapolisan sa syudad sa Mandaue, Chief Insp. Ali Baron, hepe sa Provincial Public Safety Company, Chief Insp. Carlos Reyes, hepe sa lungsod sa San Fernando ug Insp. Ruel Burlat, hepe sa Regional Public Safety Battalion.
Butyag usab ni Siclot nga ang pamaagi sa maong programa makatabang sa kapolisan nga mareporma sa ilang trabaho ug ilabi na sa ilang personal nga kinabuhi. (BANATNEWS)