CEBU, Philippines - Patay diha dayon ang usa ka sakop sa Kuratong Baleleng robbery group ug iyang kapuyo ingon man 3-anyos nga anak human gisulod sa ilang panimalay ug gipamusil diha sa sitio Tacan, barangay Babag II sa dakbayan sa Lapulapu kagahapon sa buntag.
Ang mga biktima mao si Fernando Canillo, 58, kansang tinuod pangalan mao si Bruno Villanueva alyas Tambok nga gituohang ‘keeper’ sa maong grupo kaniadto ug ang kapuyo niini nga si Emma Larano, 40, ug ilang anak nga si Fernando Canillo II nga 3-anyos kinsa pulos namatay.
Usa sa mga batang survivor ang mibutyag kagahapon sa kapolisan nga ang mihimo sa maong krimen mao ang iyang ‘uncle’ apan ang kapolisan wala mobutyag sa pangalan sa maong tawo nga gihinganlan sa mga bata nga posibleng maoy makasulbad sa maong krimen.
Ang managkapuyo gikan pa sa dakbayan sa Ozamis ug mag-usa palang ka tuig nga nagpuyo sa maong dapit. Apan base sa report giingong nagpunay lang og balhin-balhin og pinuy-anan ang maong pamilya gikan sa Ozamis ug sa Manila.
Samaran usab si Ricric Larano, igsuon ni Emma ug ang mga anak ni Canillo sa unang asawa nga nagpangidaron og 4 ug 6-anyos nga batang lalaki.
20 ka basiyo
Base sa pasiunang imbestigasyon sa kapolisan sa dakbayan sa Lapulapu uban usab ni Lapulapu City Police Office Director P/SSupt. Anthony Obenza nasayran nga mga alas 6:35 kagahapon sa buntag pipila ka mga residente sa maong dapit ang nakadungog og butobuto sa armas.
Nadiskobrehan nalang nila nga nagbuy-od na ang mga patay’ng lawas nila ni Fernando, Emma ug sa 3-anyos nga bata.
Samtang dali usab nga gidala sa tambalanan si Ricric Larano sa tambalanan, samtang nakadagan usab sa gawas ang 4 ug 6-anyos nga mga anak ni Villanueva.
Si PO2 Carlos Baluado sa Homicide Section sa kapolisan sa maong dakbayan miingon nga gipamusil ang mga biktima sa sulod sa ilang panimalay.
Adunay 20 ka mga kabhang sa kalibre .45 ang nahipos sa crime scene.
Giingong mao pay pag-abot sa mga biktima gikan sa merkado publiko ug sa ilang pag-abot gisugat sila sa mga kriminal nga luwan sa Toyota Vios nga awto.
Matud pa ni Baluado nga pipila sa mga silingan sa maong dapit ang nakakitang giagbayan pa sa usa sa mga lalaki si Fernando pagsulod sa ilang panimalay ug dangtan pila ka segundos boto na sa armas ang ilang nadunggan.
Human sa buto-buto sa armas nanakay sa usa ka awto dayong pahilayo sa maong dapit ang mga lalaki.
Way trabaho
Nasuta usab sa kapolisan nga walay trabaho si Canillo apan daghan kini og kabtangan ug giingon usab nga nalambigit kini sa financing sa mga sakyanan, natingala karon ang kapolisan nga nakaangkon kini og dakong balay nga gibanabanang mokabat og minilyon ka pesos.
Niadtong bulan sa Disyembre gitukod ang balay ug Enero na mibalhin og puyo ang pamilya niini apan nahibulong silang panagsa lang kining mogawas-gawas, walay trabaho apan kanunay mohatag og pahalipay sa mga drayber ug silingan.
Nadiskubrehan usab sa kapolisan ang daghang mga titulo sa yuta nga naa sa pangalan sa namatay.
Usa sa nakitang posibleng hinungdan sa krimen mao ang tulis tungod kay giingong naabli na ang vault sa magtiayon ug wala na kini sulod ug nagtangag pa ang yawe niini.
Keeper’ sa Kuratong
Si Obenza sa interbyu sa TV Patrol Central Visayas mikompirmar nga kanhi sakop sa Kuratong Baleleng si Villanueva nga lumad nga taga Pampanga ug nalambigit na kini sa mga pagpanulis dinhi sa Cebu ug sa kaulohan.
‘Kini siya (Villanueva) involve ni siya sa tanang mga robbery dinhi sa Cebu and sa Manila,’ matud pa ni Obenza human gikompirmar sa mga kaubanan nila sa Manila ug Mindanao ang litrato sa patay’ng lawas ni Villanueva kagahapon sa hapon.
“He is a former Kuratong member and mitiwalag and joined another group and then gipangita,” dugang pang Obenza. Ang anak sa mga biktima mibutyag usab nga nagbalhin-balhin sila’g puyo sa Manila aron molikay sa ilang “uncle.
Matud pa ni Obenza gikan sa iyang sources nga nalambigit sa pagpanulis sa SM Dasmariñas sa Manila si Villanueva ug nakuhaan kini og hulagway nga nagtabon sa nawong apan ang anak niini mismo mitudlo nga ang maong tawo mao ang iyang daddy. Gidudahan usab nga apil si Villanueva sa pagtulis sa van sa MLhuillier diha sa Lapulapu duha ka higayon sa milabay’ng tuig ug karong tuiga.
Si Obenza nagkanayon nga base sa ilang impormasyon ang wala pagkatarong og bahinay sa ilang natulis ang nakaingon nga misibat si Villanueva sa grupo.
(EIM) (BANATNEWS)