31% Pagkubos sa crime rate gikalipay ni Rama

CEBU, Philippines - Mapasigarbohong gipahibalo ni Mayor Michael Rama nga mikunhod karon og 31% ang krimen sa siyudad sa Sugbo sukad sa paglingkod niya isip mayor sa miaging tuig subay sa taho nga gihatag sa pangulo sa Cebu City Police Office nga si Senior Superintendent Melvin Buenafe.

Gumikan niini, iyang gipasidunggan ang tanang sakop sa CCPO ug gidasig sila nga magtinarong sa ilang mga trabaho alang sa kahapsay ug kalinaw sa siyudad.

Nagmalaumon gihapon si Rama nga gikan sa 31%, mahimo na unta kini og 50% nga pagkunhod sa krimen sa sunod buwan.

Gimandoan na ni Mayor Rama ang presiding officer sa Police Coordinating and Advisory Council (PCAC) nga si Major Romeo Cordova nga ipasusi ang mga panginahanglanon sa kapulisan aron mahimoan kini og rekomendasyon sa iyang buhatan.

Usa sa nakita nila nga tabanganan mao ang dugang mga sakyanan alang sa mga polis ilabi na kadtong nadestino sa mga bukirang barangay ug ang mga sakyanan sa Homicide ug Warrant Sections aron mapalapdan ang ilang operasyon.

Giawhag usab ni Rama ang kapulisan sa paghingusog sa paggukod sa mga grupo sa mga tulisan nga kasagaran mamiktima sa mga bangko, gasoline stations, pawnshops, money changer ug uban pa nga mga dagkong establisamento. (BANATNEWS)