Away sa mga misis, ulo sa panday nababha

CEBU, Philippines - Nababha ang ulo ug namatay diha dayon sa usa ka panday nga gipusil sa laing panday nga iyang silingan sa miaging alas-7 pasado sa gabii didto sa barangay Langob sa lungsod sa Argao.

Ang biktima giila sa kapulisan nga mao si Rex Ngujo, 44, ug gitumbok nga mipusil kaniya mao si Noel Gecera, 36.

Sa imbestigasyon sa kapulisan sa Argao nagbutyag nga ang biktima uban sa iyang asawang si Anecita nagkuyog sa tindahan ug diha sila naabtan sa suspek ug miingon ‘biliba ko nimo bay nahurot man akong bilib nimo.’

Gitubag kini sa biktima sa pag-ingon: “Ayaw hutda imong bilib kay wa nay mahabilin,” dayon mitalikod apan kalit lang kining gipusil sa suspek sa luyong bahin sa ulo.

Dihang nahagba ang biktima daling miuli sa ilang balay ang suspek apan wala na maabti sa mirespondeng mga polis.

Si Sr. Insp. Wilfredo Parilla, hepe sa Argao police Station mitug-an sa mga tigbalita nga base sa ilang nakuhang impormasyon wala sukad mag-away ang duha apan ang ilang mga asawa nag-abot na sa barangay tungod sa mga tabi-tabi kon tsismis.

Hinuon matud ni Parilla nga ang suspek kun makainom magmaoy ug magpunay og padungog-dungog og sulti sa mga bati batok sa asawa sa biktima.

Bisan kun niikyas ang suspek apan giandam na sa kapulisan ang tukmang kaso nga ilang ipasaka ngadto sa piskaliya. (BANATNEWS)