JRG Halad Museum buksan na

CEBU, Philippines - Ang gipalapdan nga Jose “Dodong” R. Gullas Halad Museum abli na sa iyang pultahan alang sa publiko karong Hunyo 14, 2011.

Gitukod ni Dodong Gullas aron ihalad sa iyang mga ginikanan nga sila si Don Vicente ug Inday Pining Gullas, ang nahisgutang Halad Museum maoy usa sa iyang matang dinhi sa rehiyon nga may temang pulos musika.

Ipasundayag niini ang mga nabantog ug naila na kaayong mga kabiling Sinugboanong kultura nga batbaton sa mga karaang awit nga anaa sa maong museum.

Ang JRG Halad Museum buksan pinaagi sa usa ka misa ug mga seremonyas sa pagsubo karong Lunes, Hunyo 13, 2011 sa alas 3:00 sa hapon nga dumalahon sa arsobispo sa Artsidiyosese sa Sugbo, nga si labing halangdong Reberendo Jose Palma ug ni Eminence Ricardo Cardinal Vidal.

Ang programa sundan sa Harana sa mga nabantog nga awit Sinugboanon ni Minggoy Lopez, Maning Velez, ug uban pa nga pagaawiton pinaagi sa UV Chorale, ang Mutya Orchestra ug ang inila na kaayong Sugboanon nga si Pilita Corrales.

Ang usa sa dakong bahin sa maong   kalihokan mao ang pagpalanog sa mga mananaog nga komposisyon ni Maestro Mil Villareal alang sa Halad Theme Song Contest, ang labing maayong   mga salmot gikan sa Sugbo ug sa gawas, nga giulohan og “Awit ni Dodong” nga gitagik ni Leo Lastimosa.

Ang kalihokan sa Lunes mabati usab sa kahanginan sa alas 8:00 ngadto sa alas 10:00 sa gabii pinaagi sa DYAB.

Ang patambongon ning maong kalihokan mao lamang kadtong gipadad-an og imbitasyon.

Agi og halad   sa kabahandianon sa Sugbo sa mga matahom nga awit sumala sa kasaysayan, ang museum maoy nahimutangan sa mga awit ug mga memorabilia o butang kabilin sa mga banggiitan ug inila kaayong mga mang-aawit nga Sugboanon kinsa nabantog sa talagsaon nilang kahanas ug kabatid sa natad   sa pagtagik og mga awit nga Sinugboanon.

Ang JRG bukas sa mga adlaw’ng tingtrabaho Lunes hangtod Biyernes    gikan sa alas 9:00 sa buntag hangtod alas 5:00 sa hapon ug sa mga adlaw nga Sabado ug Domingo ubos sa dakong panginahanglan.

Ang mga Senior Citizen libre sa pagsulod niini. Sa dugang kasayoran, tawaga ang telepono (032) 268-2579. (WC) (BANAT NEWS)