Joavan hataga'g higayon

CEBU, Philippines - Si Chief Inspector Eddie Recamara ang officer-in-charge sa Talisay City Police Station kagahapon nagkanayon nga angayang hatagan og higayon si Joavan Fernandez, ang anak ni Mayor Socrates Fernandez sa dakbayan sa Talisay ug tabangan sa iyang tinguhang pagbag-o sa kinabuhi.

Kini human mabati ni Recamara ang nagkalainlaing komentaryo sa katawhan sa Talisay kinsa nagduda nga “pakitang tao” ug temporaryo lamang kining kausaban karon ni Joavan.

Kini human makita sa kadaghanan si Joavan nga motabang na sa mga check point operation sa kapolisan ug paggukod niadtong mga badlungon sa dakbayan.

Si Joavan matud ni Recamara wala tugoti nga mosita sa mga motorista atol sa checkpoint apan igo lang siyang mo-assist ug wala usab siya tugoti nga makadala og armas.

“Dili man kita’y gigamit niya (Joavan) siya may mitabang, nganong dili man nato i-welcome?”, ni Recamara pa.

“Ang tawo duna may pagbag-o nganong dili man nato hatagan og chance?”, dugang pa sa OIC sa Talisay police.

Matud ni Recamara nga si Joavan mihatag og suporta ngadto sa kapolisan ug gani, siya maoy mihangyo ngadto sa iyang amahan nga hatagan og tag-duha ka litrong gasolina ang matag sakop sa Talisay City Intelligence Bureau (TCIB) nga mo-duty.

Gawas sa gasolina gihangyo usab ni Joavan ang mayor nga gahinan usab og gamay’ng honorarium ang mga TCIB aron madasig sila sa pagtabang sa mga gimbuhaton sa kapolisan.

Matud usab ni Recamara nga nagpasalamat siya nga si Joavan naukopado sa mga civic duties aron dili na kini makaatubang sa ubang mga kalihukan nga makapanudnod niya ngadto sa pagpabadlong.

Hinuon ang OIC nagkanayon usab nga walay gipili ang balaod ug kung dunay buhaton si Joavan nga dili maayo buhaton usab nila ang angayang buhaton pinasubay sa balaod. (BANAT NEWS)