Kidnaper sa Engr. ilhan na

CEBU, Philippines - Nailhan na sa kapolisan sa Basilan ang upat ka tawo nga maoy responsabli sa pagdagit kang Engr. Virgilio Fernandez, ang usa ka Sugboanong gidagit didto sa Basilan.

Sa report sa ABS-CBN Central Visayas, kagahapon sa hapon ang hepe sa kapolisan sa Basilan nga si Chief Inspector Edwin Placio mibutyag nga padayon pa sila karon nga nagpahigayon og hot pursuit operation batok sa grupo nga mikidnap ni Fernandez.

Matud pa ni Placio nga may mga ngalan na sila sa upat ka mga kidnapper   apan gipugngan pa nila kini karon .

 Miingon si Placio nga sa pagkakaron wala pa silay komunikasyon tali sa midagit ni Fernandez ug wala pa usab sila makadawat og demanda nga ransom.

Midugang si Placio nga padayon karon ang ilang imbestigasyon tali sa maong insidenti apan ilang gipaniguro nga safety si Fernandez bisan pa man og wala silay hunong sa pagpangita og pamaagi nga kini ma-rescue.

Gibutyag usab ni Placio nga ang gobernador ug bise-gobernador sa Basilan nagmiting kagahapon ug naghiusa sa ilang plano pag-rescue ni Fernandez.

Samtang nasayran ni Placio base sa ilang nakuha nga impormasyon nga ang hinungdan nga si Fernandez gidagit, tungod kay siya ray project engineer nga nagpadayon sa pagpamutang og graba sa karsada sa Lamitan padung na sa Tuburan Proper Mohamad Hajul nga milanat na og usa ka tuig.

Laing impormasyon nga nakuha ni Placio nga sa wala pa dagita si Fernandez adunay mipahigayon og “surveillance” kaniya nga siya dagiton apan nasayran lang ni Placio ang maong impormasyon sa diha nga gidagit na si Fernandez.

Apan nasayran usab ni Placio nga ang kaubanan ni Fernandez nangayo na diay unta og protection sa ilang manager ug gani ang maong project area adunay gidestino nga security.

Mi-awhag usab si Placio ngadto sa mga lokal nga opisyal sa Sugbo nga unta mohimo og komunikasyon tali sa local government unit sa Basilan.

Gihulagway usab ni Placio nga ang mudos sa mga kidnapper mao ang ransom ug extortion diin ang mga kidnapper lang usab ang mokontak ngadto sa ilang gusto nga kontakon alang sa ransom nga ilang gikinahanglan

Kini samtang si Mayor Michael Rama mipasalig nga iyang kontakon ang iyang mga kaila nga opisyal sa kagamhanan sa Basilan aron katabangang maluwas si Fernandez gikan sa mga kamot sa mga midagit kaniya.

Mao gihapon ang giplano ni Gobernador Gwendolyn Garcia diin modangop kagahapon ang pamilya ni Fernandez alang sa panabang, apan wala ibutyag sa gobernador kun unsay mga lakang niini nga buhaton aron pagsulbad sa pagdagit kang Fernandez. (BANAT NEWS)