CEBU, Philippines - Magpabiling mabilanggo ang inahan sa unom ka mga bata nga giingong miunay pag- lawog sa iyang mga anak pinaagi sa cybersex pornography didto sa Lapu-lapu City Jail.
Matud ni Bise Gobernador Agnes Magpale, co-chairperson sa Provincial Women’s Commission (PWC) nga dili na ipadayon ang tinguha nga mabalhin ang nagsabak nga inahan kinsa suspetsado sa pagbugaw sa iyang unom ka mga bata sa cybersex pornography ngadto sa Cebu Provincial Detention and Rehabilitation Center (CPDRC).
Kini human usab masuta sa PWC nga dunay mga doktor nga kanunay’ng makabisita sa nahisgutang suspetsado aron magsusi sa kahimtang niini.
Gipasabot usab niini nga may tukma nga pasilidad ang prisohan sa siyudad sa Lapu-Lapu alang sa mga piniriso nga nagsabak hinungdan nga dili na angayan nga kabalak-an ang kahimtang sa suspetsado.
Giklaro ni Magpale nga ang maong tinguha niya nga mabalhin kini sa CPDRC base usab sa gihangyo sa suspetsado ngadto sa mga opisyales sa Lapu-Lapu City Jail.
Samtang gipahibawo ni Magpale nga nagpadayon na karon ang stress debriefing sa unom ka mga bata.
Sigon pa niini nga gilahi karon sa pagbutang og kwarto ang laing bata nga gidala sa apohan niini ngadto sa sentro sa DSWD.
Kahinumduman nga giluwas ang mga bata sa hiniusang pwersa PWC ug sa National Bureau of Investigation (NBI-7) didto sa lungsod sa Cordova sa milabay’ng semana.
(BANAT NEWS)