CEBU, Philippines - Naugdaw ang duha ka balay usa niini ancestral house giingong gumikan sa usa ka hubog nga nagpataka lang og labay sa opus sa sigarilyo sa Poblacion, lungsod sa Sibonga niadtong Martes sa alas 11:55 sa gabii.
Ang nangasunog nga balay gipanag-iya nila ni Rosalia Cuizon Alegrado ug Antedio Cuizon ug Maria Mosqueda, pulos hingkod ang panuigon ug mga residente sa maong dapit.
Matud ni Inspector. Ramonito Alegrado, fire marshal sa nahisgutang lungsod nga gibana-banang mukabat ngadto sa P100 mil ang kinatibuk-ang danyos sa duha ka panimalay nga naugdaw sanglit gama lang kini sa gaay nga mga materyal.
Ang kayo sa sunog nakontrolar sulod sa 15 minutos gikan sa pag-alarma sa mga bombero.
Subay sa imbestigasyon sa kabomberohan nagsugod ang kayo sa bung-bong nga kahoy sa pinuy-anan sa pamilyang Cuizon nga daling nikaylap sa tibuok balay ug nakatabok sa sikbit nga panimalay.
Gituohan sa kabomberohan nga opus sa sigarilyo nga gipataka og labay diha sa bungbong diin daghan usab ang nagpundok nga kahoy nga gibutang diha sa duol hinungdan sa sunog.
Sa nahipos usab nga report sa kabomberohan nga nipauli nianang gabhiona ang usa sa mga anak ni Rosalia Cuizon nga si Toyben kinsa giingong hubog ug nanigarilyo.
Hinuon giklaro ni Inspector Alegrado nga wala pay labot sa danyos ang mga appliances niini sama sa TV ug uban pa nga naapil og kasunog.(BDB) (BANAT NEWS)