CEBU, Philippines - Usa ka patay’ng lalaki nga natusak sa samad pinusilan ang kalawasan ug gidudahang kawatan ug gituohan usab nga gikan sa prisuhan tungod sa mga patik sa lawas ang nakit-ang wala nay kinabuhi sa mingaw nga lugar sa sitio Curos-curos, sa barangay Magsaysay lungsod sa Balamban niadtong Lunes sa alas 9:00 sa gabii.
Ang biktima sa paghimo ning balita wala pa mailhi sa kapulisan gumikan kay walay pitaka ug identification card nga dala ug walay nakaila sa mga molupyo sa maong lugar.
Gihulagway kini nga nagpangidaron og 30 ngadto sa 40-anyos, nagsul-ob og sinina kolor puti, nag-shorts og fatigue, nakakawo og kolor puti ug dunay patik sa tuong tiil nga dunay pangalan nga ‘Joryl’ ug sa ubos nga bahin dunay laing patik nga ‘BC-45.’
Ang patik nga BC-45 kon Batang Cebu sagad makuha sulod sa kaniadto Bagong Buhay Rehabilitation Center sa barangay Apas ug sa New Cebu City Jail sa barangay Kalunasan ning dakbayan.
Matud ni PO2 Cesar Climaco sa Balamban Police dihang nahinabi sa Banat News ang kapitan sa barangay nga si Jose Baterna maoy mipahibawo sa ilang buhatan kabahin sa nahitabong pagpamusil. Atol sa imbestigasyon na-recover gikan sa crime scene ang upat ka kabhang sa bala sa kalibre .45 ug laing duha ka deformed slugs sa susamang kalibre sa armas.
Dugang nahipos nga impormasiyon sa kapulisan gikan sa mga molupyo sa maong lugar nga nianang pagkagabii nakadungog sila og sunod- sunod nga buto sa armas gikan sa maong lugar.
Ang kapolisan mitawag na sa dakbayan sa Talisay human dunay nakasulti nga taga siyudad sa Talisay ang biktima.
Gituohan sa kapulisan nga gi-atangan ang biktima sa maong lugar nga distansya sa mga panimalay ug mingaw ug didto gipusil.
Ang kapulisan padayon pa sa ilang imbestigasyon pag-ila ug pagtumbok sa mga responsable sa krimen. (BANAT NEWS)