Tulo nangalumos

CEBU, Philippines -  Tulo ka tawo ang nangamatay human nangalumos samtang nanagat niadtong miaging adlaw sa managlahing lugar sa probinsya sa Sugbu.

Sa lungsod sa Dumanjug, nalumos ang usa ka lalaki ug pag-umangkong babaye ug napalgang naglutaw sa dagat sa barangay Bitoon niadtong Lunes sa alas-2 sa hapon ug alas-8 sa gabii.

Ang nangamatay mao sila si Paulino Ynilog, 45, ug pag-umangkon nga si Conception Ynilog, 17, molupyo sa nahisgutang barangay.

Si Sr. Insp. Gerard Pelare, hepe sa Dumanjug Police Station nga nahinabi sa Banat News nagkanayon pasado alas-7 sa buntag niadtong Lunes nanginhas ang duha nga wala magsakay og baroto.

Wala na makauli sa ilang pinuy-anan ug na-missing ang duha nianang pagkaalas-2 sa hapon naukay ang mga residente sa dapit sa dihang unang nakit-an ang 17-anyos nga naglutaw sa dagat nga patay na.

Samtang pagka alas-8 sa gabii nakit-an usab sa kapulisan ug sa mga residente sa dapit ang uyoan nga midagsa na sa daplin sa baybayon ug patay na.

Ang duha ka biktima pulos nakaangko’g samad sa ilang nawong ug kalawasan sa dihang napalgan ang ilang patay’ng lawas.

Matud ni Pelare nga nag-request siya og mga sakop sa Scene of the Crime Operatives (SOCO) aron ipa-awtopsiya ang patay’ng lawas sa mga biktima apan nasuta nga ang namatyan nila mao ang pagkalumos.

Nagtuo ang kapulisan nga posibleng napangka ang nawong sa mga biktima ilawom sa dagat maong nangasamad.

Matud ni Pelare nga nagtukod siya og team nga gipangulohan ni SPO1 Felipe Vivar aron mo-focus sa imbestigasyon sanglit wala pa nila i-discount ang posibilidad nga posibleng gibinuangan ang mga biktima bisan tuod aksidente ang maong hitabo.

Samtang sa sitio Bakhaw, barangay Catmon-Daan sa lungsod sa Catmon usa ka Michael Arija Prota, 27, ang nalumos nga naglutaw na sa dagat human kini managat sa miaging adlaw pasado alas 3:30 sa hapon didto sa nahisgutang lugar.

Segun sa report sa kapulisan nga midangat sa Operations Branch sa Cebu Provincial Police Office (CPPO) usa ka Leonel Colonia Moleon, 57, maoy mipahibalo sa kapolisan human ang inahan sa namatay nga si Erlinda Arija nakit-an ang anak nga naglutaw na sa dagat.

Matud sa inahan nga sa wala pa mapalgi ang iyang anak nanagat kini apan gituohang giatake sa iyang sakit nga Epilepsy (patol) hinungdan sa iyang pagkalumos ug namatay.

Hinuon ang kapulisan mirekomendar sa ginikanan nga ipailawom sa awtopsiya ang biktima aron masuta kun duna bay foul play ang kamatayon sa biktima.

Niadtong milabay’ng Domingo sa gabii, duha ka magsuong bata nga taga Carcar ang nangalumos usab sa fishpond nga gibantayan sa ilang amahan.(EIM) (BANAT NEWS)