CEBU, Philippines - Gilangaw gihapon ang ikaduhang adlaw sa pagpanghatag sa mga Pantawid Pasada Cards alang sa mga operators sa pasaheroan sa Sugbu nga gipahimutang sa SM-terminal sa North Reclamation Area.
Gibasol sa mga opisyal ang kakulang pa sa pagpakatap sa impormasyon bahin niini ug ang kadautan sa panahon ang nakaingon nganong walay mga operators nga nanuyo og duaw sa maong booth aron kuhaon ang maong mga cards aron makapahimulos sa hinabang pinansiyal sa gobyerno pagpaminus sa epekto sa padayung pagsaka sa presyo sa lana.
Kagahapon sa udto gipadayag ni Land Transportation Office (LTO)-7 regional director Raul Aguilus dihang nahinabi sa Banat News nga susama niadtong Lunes atol sa unang adlaw sa pag-apod apod sa mga cards minus gihapon ang nanguhang operators kagahapon.
Adunay kapin sa 11 mil ka mga cards ang giandam nga ihatag alang sa mga lehitimong operators dinhi sa Sugbo ug tibuok Central Visayas.
Apan matod ni Aguillus nga sukad kagahapon sa udto gibanabana niya nga moabot lang sa 500 ngadto sa 600 ka mga cards ang ilang nahatag.
Ang LTO-7 ug Land Transportation Franchising and Regulatory Board (LTFRB)-7 nagbutang og mga lamisa diha sa SM terminal sugod adtong Lunes alang niini.
Hinuon gituohan ni Aguilus nga ang kakuwang sa pagpakatap sa inpormasiyon maoy labing unang hinungdan nga minus lang nga turnout sa mga benepisaryong mga operators ug drayber.
Karung Biyernes ug sa Huwebes gipaabot nga magdasok sa mga operators ang ilang booth aron pagkuha sa maong cards apan pagkahuman niini adto na kini makuha sa ilang buhatan. (BANAT NEWS)