2 nagmotor gipamusil

CEBU, Philippines -  Naangol ang duha ka mga lalaki human pamusila   sa mga kriminal nga wala hiilhi didto sa barangay Basdiot, lungsod sa Moalboal niadtong Domingo sa hapon.

Ang mga bitkima mao sila si Joselito Tapales, 34, ulitawo, ug Abelardo Gemina, 52 , minyo, pulos mga molupyo sa nahisgutang lugar.

Si PO1 Eric Bongbong sa Moalboal Police Station mibutyag sa Banat News nga ang mga biktima nagsakay og motorsiklo paingon sa barangay Tobli nga gimaneho ni Tapales.

Apan pag-abot nila sa Basdiot kalit silang gipamusil sa duha ka wala hiilhing tawo nga gituohang nag-atang nang daan sa maong lugar.

Ang mga biktima nga pulos nakaangkon og samad pinusilan sa ilang kalawasan daling gitabang sa mga molupyo sa maong lugar ug gihatud dayon ngadto sa Badian District Hospital sa lungsod apan gibalhin usab dayon ngadto sa South General Hospital sa siyudad sa Naga. Ang kapulisan padayon pa sa ilang imbistigasyon pagtumbok sa mga responsabli   sa maong krimen.

Personal nga bangi ang gitutokan karon sa kapolisan nga posibleng hinungdan sa maong pagpamusil.  (BANAT NEWS)