Ginang napunggit sa motor tipi

CEBU, Philippines -  Patay ang usa ka ginang human kini madasmagi sa usa ka motor sa national highway sa barangay Pinungkalan lungsod sa Catmon pasado alas-8 sa buntag kagahapon.

Ang namatay mao si Rosita Roilo, 60, taga barangay Fuente lungsod sa Carmen. Samtang ang drayber nga nakabangga mao si Ronnel Palco, 36, molupyo sa dalan Gaboya, Cogon-Pardo ning dakbayan sa Sugbu.

Sa pakighinabi sa Banat News ni PO3 Arnel Fruta, sa Catmon Police mibutyag kini nga si Palco padulong sa amihanan dihang pag-abot sa maong dapit kalit milabang sa karsada ang ginang.

Tungod sa kakalit sa paglabang wala na maka-brake si Palco hinungdan nga iya gyud nadumbolan.

Matud pa ni Fruta nga bisan paman og dili kaayo kusog ang dagan ni Palco iya gihapon nga nadumbulan ang biktima ug tungod niini natumba kini ug maayong pagkalamba ngadto sa sementadong karsada.

Ang biktima daling gidala sa Juan Dosado Memorial Hospital sa lungsod sa Sogod apan gideklarar kini nga dead on arrival. (BANAT NEWS)