Gipusil samtang nagbasketbol talandugon

CEBU, Philippines -  Usa ka lalaki nga nagduwa og basketball ang anaa karun sa kritikal nga kahimtang sa dihang gipusil sa miaging alas 5:30 sa hapon niadtong Domingo diha sa sitio Fatima, Tagunol sa barangay Basak-Pardo siyudad sa Sugbu.

Ang biktima kinsa nahiagom og daghang samad pinusilan sa iyang kalawasan giila nga si Christopher Omonong Canoy, alyas ‘Toper’, 31, motorcycle mechanic ug residente sa sitio Katangkongan sa barangay Basak Pardo.

Samtang usa ka Manolito Monteclar Labor alyas ‘Manoling’ ug residente sa sitio Exobel Tagunol sa Basak Pardo maoy gitumbok nga mipusil kang Canoy.

Sa pasiunang imbestigasyon ni SPO4 Rey Cuyos ug mga kaubanan sa Homicide Section sa Cebu City Police Office (CCPO) nagbutyag nga nagduwa og basketball ang biktima uban ni Jeffrey Cañete ug mga higala diha sa nahisgutang lugar sa dihang ang suspek kalit miabot dayon mipusil sa biktima makadaghang higayon.

Bisan kun samaran nakahigayon pagdagan paingon sa balay ni Nicomedes Algaba si Canoy apan gigukod kini sa suspek ug gitiwasan pagpusil.

Human sa hitabo ang suspetsado daling miikyas sa lugar samtang ang biktima gidali paghatud sa Cebu City Medical Center (CCMC).

Si SPO2 Gerald Cui ug mga kaubanan sa Pardo Police Station daling migukod sa suspek apan napakyas sila pagsikop niini.

Nakuha sa kapulisan sa crime scene ang lima ka basiyo sa bala sa kalibre .45 sulod sa balay ni Algaba samtang duha usab diha sa basketball court.

Ang kapulisan padayun sa ilang imbestigasyon aron matino kun unsay hinungdan nganong gipusil ang biktima sa suspetsado. (BANAT NEWS)