Apektado sa mahiga creek hatagan vending area

CEBU, Philippines -  Gipaneguro ni Mayor Michael Rama nga dili maapektuhan ang panginabuhian sa mga tawong naigo sa clearing operation sa mga kabalayan duol sa Mahiga Creek tungod kay may gigahing temporaryong vending area sa bakanteng luna sa siyudad nga nahimutang sa North Reclamation Area.

Nagkanayon si Rama nga iya na nga gipatrabaho ang maong dapit ug pabutangan og suga aron makatarong ang mga tawo sa pagbutang og puwesto sa ilang mga negosyo.

Nasayran nga mihangyo kang Rama ang kapin sa 32 ka mga pamilya sa Mahiga nga tagaan unta sila og pwesto aron makapadayon sa ilang panginabuhian.

Apan giklaro sa mayor nga ang gihatag nga vending area dili pwedeng himuong puy-anan, ang temporaryong puy-anan sa mga naapektohan sa clearing operation adto ipahimutang sa Block 27 sa nahisgutan gihapon nga dapit.

Usa ka ginang nga dili magpaila ang nahinabi dinhi sa Banat News miingon nga mas maayo nalang kini kaysa wala.

“Nagpasalamat mi sa mayor nga duna siya’y gihatag nga lugar para sa among panginabuhian. Dili man gud lalim ang among kahimtang kay duna mi mga anak nga giatiman, samot na karon nga nagsugod na ang klase busa kinahanglan nga manginabuhi ta og maayo,” matud pa sa maong ginang.  

Si Mayor Rama mibisita sa Mahiga Creek kagahapon aron inspeksyonon ang kasamtangang kahimtang sa maong dapit.

Samtang nagpadayon gihapon ang siyudad sa pagkubkob sa lapok sa sapa busa kinahanglan gyud ang clearing operation aron maderetso-deretso na ilang trabaho.

Nasuta usab nga adunay pipila ka bahin sa tampi sa sitio San Isidro diha sa Mahiga Creek ang nakaliki ug gikabalak-an sa City Disaster Coordinating Council nga maghatag og peligro sa mga molupyo kun wala pa sila mapapahawa.(EIM) (BANAT NEWS)