CEBU, Philippines - Mikabat sa 10,132 ka punoang marijuana ang gidauban sa kapolisan sa lungsod sa Carmen ug laing 55 usab ka punoan ang nalarot sa hiniusang operasyon sa kapolisan didto sa sitio Centro, barangay Liboron sa lungsod sa Ronda alas 3 sa miaging adlaw.
Si SPO2 Simplicio Gibo sa kapolisan sa Carmen nga nahinabi sa Banat News miingon nga si Cebu Provincial Police Director Patrocenio Comendador, mga lokal opisyal ug kaparian sa maong lungsod misaksi sa gihimong pagdaub.
Matud pa ni SPO2 Gibo ang maong gidaghanon sa hamtong na nga punoang marijuana daan na nilang natigom sa miaging mga buwan sa gihimo nilang pagpanglarot ning maong ginadiling tanom sa kabukiran sa maong lungsod.
Midugang siya nga ang pagpanglarot gipangunahan ni Inspector Edgar Awe, officer in charge sa kapolisan sa maong lungsod ug kauban usab niya ang mga sakop sa 21st IB sa Philippine Army nga gipangulohan nila ni Leutenant Eric Pedaso ug Leutenant Lorenzo Siobal ug mga sakop sa Philippine Drug Enforcement Agency (PDEA) 7.
Gitataw ni SPO2 Gibo nga walay nadakpang tag-iya sa maong mga tanom apan padayon pa nilang gipanid-an ang mga mag-uuma nga nananom og marijuana sa bukid. (BANAT NEWS)