CEBU, Philippines - Kritikal ang kahimtang sa usa ka ulitawo human kini unaya og dunggab sa iyang uyoan sa Purok II, barangay Cubacub, dakbayan saa Mandaue sa miaging gabii.
Ang biktima mao si Jamel Sepe, 23, ulitawo, samtang ang suspetsado mao si Manuel Sepe Cedillo, 53, biyudo, ug silingan sa biktima sa Cubacub
Si PO3 Tirso Plania sa Presinto 6 sa Canduman Police Station sa Mandaue City Police Office (MCPO) miingon nga gikainom sa biktima ang suspetsado sayo sa hapon sa maong adlaw.
Dihang nangahubog na kalit lang mitumaw ang panaglalis nga maoy nakaaghat sa suspetsado sa pagpauli sa ilang balay.
Apan matud pa ni PO3 Plania nga mibalik ang suspetsado sa maong dapit nga nagdala na og kutsilyo.
Unya giduol niini ang biktima nga naglingkod ug dayon gipanunggab ang kalawasan.
Gihatod dayon ngadto sa Mandaue City District Hospital apan gibalhin kini ngadto sa Vicente Sotto Memorial Medical Center sa dakbayan sa Sugbo. Samtang ang suspetsado dali usab nga nadakpan sa kapolisan ug gibalhog ug nagtingkagol na karon sa prisohan. (WC - (BANAT NEWS)