CEBU, Philippines - Mikabat sa walo ka balay ang naugdaw samtang pito usab niini ang igo lang nakan-an sa kayo atol sa sunog nga miigo didto sa Purok 1, barangay Nangka, lungsod sa Consolacion kagahapon sa pasado ala 1:00 sa hapon.
Sa pakighinabi sa Banat News ni SFO1 Benie Lakang, Fire Investigator sa lungsod sa Consolacion, nasayran nga ang kayo nagsukad sa balay ni Rodulfo Rios.
Matud ni Lakang nga wala pa nila masayri kun unsa gayud ang hinungdan sa maong sunog apan maayo nalang kini tungod kay bisan og daghan ang balay nga nasunog apan walay bisan usa nga naangol o nakabsan sa kinabuhi.
Midugang si Lakang nga ila pang gisusi kun pila gayud ang gidak-ong kantidad sa mga kabtangang nasunog.
Gibutyag usab ni Lakang nga gibutang nila ang maong alarma sa sunog sa second alarm ug nakontrolar kini sulod sa 15 minutos.
Samtang gibutyag usab niya nga kasagaran sa problema nga ilang nahimamat mao lang ang kaapiki sa dalan kay gagmay kaayo sa lugar nga nasunogan. Gihulagway usab ni Lakang nga ang mga balay nga nasunog kasagaran ginama sa gaan nga materyales. - (BANAT NEWS)