Gwen mipabaha'g proyekto sa Compostela

CEBU, Philippines - Gipabahaan ni Gobernador Gwendolyn Garcia og mga mehoras ang lungsod sa Compostela bisan pa og OIC lang ang nagsilbing mayor sa maong lungsod.

Matud pa sa gobernador nga lima gyud ka mga dagkong mga proyekto ang iyang gihatag sa lungsod sa Compostela tungod usab sa pagpunay og hangyo sa OIC mayor nga si DILG-7 Regional Director Pedro Noval Jr.

Matud pa ni Noval nga dako kaayo og ikatabang ang hinabang ni Garcia kay dagko man ang kantidad sa maong proyekto nga siguradong kapahimuslan sa mga molupyo sa lungsod sa Compostela.

Ang maong mga proyekto mao ang road repair and maintenance sa Mulao Junction ngadto na sa Dap-Dap junction nga mobalor og kapin sa P823 mil; Water System sa merkado sa kantidad nga P150 mil; Solid waste management program nga P500 mil; School building program P 250 mil ; ug ang Flood and River Control sa Cot-cot river ug Tamio junction nga nikantidad og P250 mil.

Kahinumdoman nga nagpabiling lisod ang kahimtang sa nahisgutang lungsod gumikan kay wala pay mayor, bise mayor ug mga konsehal nga nakalingkod aron mopasar og balaodnon nga mopatuman sa mga proyekto nga gikinahanglan sa katawhan sa Compostela.  - (BANAT NEWS)