2 aksidente 2 patay

CEBU, Philippines - Nakabsan sa kinabuhi ang usa ka ginang samtang nalandig sa tambalanan ang bana niini uban sa laing duha ka silingan human gidaro sa Ceres Bus liner ang ilang gisakyang traysikol sa miaging gabii sa national highway sa barangay Binlod lungsod sa Argao.

Ang namatay mao si Regina Llenado, 46, samtang ang angol mao ang bana niini nga si Romeo ug sila si Encarnacion Escalante, 75, ug Anecita Modina, 64, ang mga biktima molupyo sa barangay Binlod.

Samtang ang nakadasmag kanila mao ang Ceres Bus nga adunay body number nga 8992 nga nagtangag sa plakang RSA-896 nga gimaneho ni Edwin Dela Cruz Intao, 36, taga La Libertad, Bogo City.   

Sa pakighinabi sa Banat News ni PO3 Benjamin Gerozaga sa Argao Police nga ang mga biktima gikan sa panimalay sa pamilyang Camasura ug sa ilang paglabang padulong sa barangay Poblacion napunggit kini sa maong bus.

Apan sa diha nga mitabok na ang maong traysikol kalit kining napunggit sa maong bus. Giingong wala mosaler ang pag-brake sa bus sanglit nadasok niini ang traysikol og pipila ka metros.

Daling gidala sa Isidro Kintanar Memorial Hospital ug gibalhin sa Vicente Sotto Medical Center apan si Gerozaga mibutyag nga kagahapon pasado alas 9 sa buntag nakabsan sa kinabuhi si Regina.

Samtang ang drayber sa Ceres Bus kasamtangan pa nga natanggong sa buhatan sa Argao Police Station samtang nagpaabot sa reklamo nga isang-at batok kaniya.

Sa laing bahin, patay ang usa ka 69-anyos nga lola ug kritikal ang kahimtang sa laing 67-anyos nga lolo human kini madasmagi og V-hire nga sakyanan sa ilang paglabang sa karsada sa tungason nga bahin sa Trans-Central Highway sa barangay Prenza lungsod sa Balamban niadtong Biyernes sa alas 3:20 sa hapon.

Ang namatay samtang gi-atiman sa mga doktor mao si Dominga Clarus Salvacion, 69, molupyo sa nahisgutang lugar. Samtang ang laing naangol mao ang kauban niini nga si Alfredo Mosquera Roxas, 67, taga Lakdon, barangay Cambuhawe sa mao gihapong lungsod.

Samtang ang nakadasmag nila mao ang V-hire nga sakyanan dunay plaka nga GWV-712 nga gimaneho ni Joel Manabat Mananay, 36, molupyo ra usab sa nahisgutang lugar.

Matud ni PO2 Darwin Suico sa Balamban Police Station dihang nahinabi sa Banat News gikan sa barangay Aliwanay si Mananay padulong na pauli.

Apan pag-abot sa maong tungason nga lugar nakuratan nalang kini sa paglabang sa mga tiguwang ug nadasmagan niya ang duha ug parehong nangalagpot.

Pulos nakaangkon og daghang mga pangos og samad sa kalawasan ug ulo ang mga biktima ug gidali niya pagdala sa Balamban District Hospital diin namatay si Salvacion samtang padayong giatiman si Roxas.

Boluntaryong mitahan sa iyang kaugalingon ngadto sa kapulisan si Mananay. - (BANAT NEWS)