Gipusil atubangan sa asawa

CEBU, Philippines -  Usa ka lalaki ang gipusil patay atubangan sa iyang asawa sa miaging alas-6 sa gabii diha sa dalan J. Briones St., sa barangay Carreta siyudad sa Sugbu.

Patay nang nahidangat sa tambalanan si Jelmar Sumampong, 38, nagpuyo sa sitio Kalinao sa barangay Carreta samtang ang gitumbok nga nakapusil mao si Teodoro Mahilum alyas ‘Doring’ residente sa Ludo and Luym.

Si Marites Sumampong, 28, asawa sa biktima misaysay ni SPO4 Rey Cuyos ug mga kaubanan sa Homicide Section sa Cebu City Police Office (CCPO) nga sa wala pa mahitabo ang pagpamusil nagkuyog sila sa biktima naglakaw sa maong lugar.

Apan nag-abot ang biktima ug suspek ug gikomprontase sa iyang bana ang suspek kabahin sa pagpangulata sa naulahi sa usa ka batang menor de edad.

Ang suspek nasuko ug mipusil sa biktima sa tuong nawong ug gidali paghatud sa Cebu City Medical Center (CCMC) apan namatay kini.

Samtang ang suspek daling miikyas sa lugar ug wala na maabti sa kapulisan nga miresponde.

Narekober sa kapulisan sa crime scene ang usa ka .38 homemade revolver, tulo ka buhing bala sa tambor niini, tulo ka basiyo, usa ka holster ug usa ka kolor orange nga sweat shirt sa suspetsado