Naga may bag-ong hepe sa polis

CEBU, Philippines - Pormal na nga miasumer isip officer-in-charge sa City of Naga Police Station si Chief Inspector Timmar Alam puli kang Senior Inspector Rolando Evalle ug kagahapon sa buntag gipahigayon ang turn-over ceremony.

Si Alam maoy kanhi hepe sa Badian Police Station sa wala pa kini sa iyang posisyon karon.

Si Evalle gikan sa Naga Police Station maoy milingkod nga hepe karon sa Sibonga Police Station.

Niadtong Mayo 27, 2011 si Cebu Provincial Police Office (CPPO) Director S/Supt. Patrocinio Comendador miluwat og order nga si Evalle kinsa naglingkod isip officer-in-charge sa Naga Police Station sulod sa unom ka buwan pahulipan ni Alam.

Si Comendador mipasabot nga ang Naga usa ka siyudad ug nagkinahanglan kini og hepe nga labaw pa og ranggo kang Evalle, pagtuman sa ilang palisiya.

Si Comendador nagkanayon usab nga ang pagpahigayon og turn-over ceremony kagahapon gihimo alang sa “smooth transition of leadership” gawas nga mandato kini sa PNP memorandum circular.

Sa laing bahin, si Mayor Valdemar Chiong kinsa mitambong sa kalihukan mipasalig kang Alam nga ang lokal nga kagamhanan sa siyudad hugot nga mosuporta sa kapolisan.

Si Chiong mihangyo kang Comendador nga mohatag og dugang polis sa Naga tungod kay ang Naga aduna lay 26 ka polis ug ang populasyon sa siyudad mikabat na sa 100,000.

Ang mayor mibutyag usab bahin sa problema sa gidiling drugas sa barangay Langtad ug ang maong sitwasyon usa ka hagit sa bag-ong hepe.

Ang hepe sa CPPO nagkanayon nga mipahigayon na sila og mga saturation drive diha sa lugar human sa nahitabong pagpamusil niadtong Mayo 21, 2011 kinsa si PO1 Antonio Icalina sa Tudela Police Station naangol sa insidente.

Giangkon ni Comendador nga adunay kalambigitan sa drugas ang maong insidente.

Si Comendador mipasalig kang Chiong nga laing siyam ka mga polis ang idestino sa Naga sulod niining buwana. (BANAT NEWS)