CEBU, Philippines - Seryuso ang kahimtang sa usa ka 3- anyos nga batang lalaki human kini madasmagi og traysikol dihang nabuhian sa nag-agak kaniya nga batan-ong nagbantay sa ilang paglabang diha sa karsada sa barangay Malbago lungsod sa Madredijos isla sa Bantayan niadtong Martes sa alas 5:45 sa hapon.
Ang biktima mao si Khent Arjune Apawan Villaciran, 3, molupyo sa nahisgutang lugar samtang ang drayber sa traysikol nga nakadasmag kaniya mao si Ramil Labor.
Matud ni SPO1 Wainright Desabille sa Madredijos Police Station dihang nahinabi sa Banat News paingon unta ang bata uban sa nagbantay niini motan-aw og basketball sa tabok sa kalsada.
Apan sa ilang paglabang nakabuhi ang bata ug nagpataka og dagan hinungdan nga nadasmagan sa traysikol nga paingong mag- deliver og mga softdrinks.
Maayung pagkalamba sa biktima ug nakaangkon og kadaut sa iyang kalawasan ug gidali pagdala sa Bantayan District Hospital samtang mitahan sa kapolisan si Labor. (BANAT NEWS)