CEBU, Philippines - Namatay ang usa ka magul-anong batan-ong lalaki nga gituohang naghikog pinaagi sa paghigot og pisi nga nylon sa iyang liog sa labong nga kawayanan sa Purok 8 sa sitio Mangga sa barangay Cansaga sa lungsod sa Consolacion nga nadiskubrehan alas- 10 ang takna sa miaging Martes sa gabii.
Giila ni SPO3 Alin Garciano ang namatay nga mao si Jemal Alivio Baquer, 21, nagpuyo sa maong dapit nga nadiskubrehan ni Joseph Lerio nga ilang silingan nga nagbitay sa punoan sa kawayan.
Matud pa ni Garciano nga si Lerio maoy mitawag sa amahan sa namatay nga si Jaime Baquer Sr. ug ilang gitabangan sa pagputol ang pisi nga gibitik paghigot sa liog niini apan patay na diay kini.
Si Garciano miingon nga base sa gitug-an sa amahan sa namatay nga makaduha na ka higayon nga misulay ang iyang anak sa paghikog apan dali kini nilang mapakgang.
Gisugilon sa amahan nga magul-anon kaayo ang namatay nga si Jemal sanglit dali kining mahiubos kun dili tagdon sa babaye nga iyang maibgan ug dali usab nga mahiubos kun kasab-an. (BANAT NEWS)