Payag natagakan sa trak 3 naangol

CEBU, Philippines -  Tulo ka mga batan-on ang naangol duha niini minor de edad dihang nadat-ugan ang ilang payag nga gipuy-an dihang mitipas og karsada ang trak de karga nga puno sa scrap iron sa barangay Langtad siyudad sa Naga niadtong Martes sa alas 10:15 sa gabii.

Ang mga biktima mao sila si Jerry Villarin, 21, Gorben Villarin,16, ug Frellon Villarin,14, nga mga molupyo sa nahisgutang lugar samtang ang drayber sa trak dunay plaka nga GPL-760 mao si Geronimo Panolira, 53, taga Tabunok, Talisay.

Matud ni PO1 Junarie Latorre, desk officer sa Naga City Police Station dihang nahinabi sa Banat News subay sa imbestigasiyon ang trak nga puno sa scrap iron paingon sa siyudad sa Sugbo samtang ang mga biktima nangatulog sulod sa ilang pinuy-anan niadtong higayuna.

Gipasanginlan sa drayber sa maong trak ang gisundang traysikol nga kalit mihunong hinungdan nga na-atrasawo na kini pag-brake ug iyaha nalang kining gilihayan apan gidemalas kay nalahos kini sa daplin ug mi-ambak sa ubos nga bahin sa karsada lahos ngadto sa payag sa mga biktima.

Ang mga biktima daling gihatud sa South General Hospital ug sa paghimo ning balita padayun pang giatiman sa mga doktor samtang ang drayber sa trak kasamtangang gitanggong sa kapulisan alang sa dugang imbestigasyon ug sa pagpasaka sa tukmang sumbong.(EIM)(BANAT NEWS)