Tabunok vendors mosukol

CEBU, Philippines - Mga vendors sa merkado publiko sa Tabunok mibahad nga padayon nilang supakon ang pagpamugos pagpabalhin kanila ngadto sa bag-ong merkado sa barangay Lagtang.

Kagahapon sa buntag mitambong sa regular nga sesyon sa konseho sa Talisay apan nasagmuyo human maaprobahi ang resolusyon 2011-18-3 nga hingpit nang nagmando sa pagpasira sa merkado sa Tabunok ug balhinon ang operasyon niini ngadto sa bag-ong merkado sa barangay Lagtang.

Si Paul Labalan ang tigpamaba sa mga vendors sa pakighinabi sa Banat News kagahapon nagkanayon nga daan na silang nasayod nga dili sila paboran sa konseho.

Apan magpadayon gihapon sila sa ilang kawsa bisan moabot pa sa korte.

 Kahinumduman nga ang mga vendor miduso og reklamo sa korte maong niadtong Mayo 27, 2011 si Regional Trial Court (RTC) Judge Douglas Marigomen sa Branch 5 miluwat og 20 ka adlaw nga Temporary Restraining Order (TRO) nga dili una mapasira ang merkado.

Ang mga vendors pinaagi sa ilang abogado nga si Sinajon Esparagoza miduso og kopya ngadto sa Visayas Ombudsman kabahin sa ilang hangyo ngadto sa konseho sa siyudad nga dili una mopasar og mga resolusyon ug ordinansa kabahin sa maong isyu samtang wala pa maresolba ang kaso ngadto sa korte.

Kagahapon gipahigayon ubos sa sugyot ni Konsehal Romeo Villarante, nagbotohay ang mga konsehal nga miresulta sa siyam ka konsehal ang pabor sa pagpasira sa maong merkado ug tulo lang ang wala mouyon nga sila si Villarante, Val Ylanan ug Danny Caballero gikan sa minoriya.

Sa maong sitwasyon ang nahisgutang resolusyon nga gipangamahanan ni Konsehal Edward Alesna naaprobahan.

Si Villarante nga nahinabi sa Banat News kagahapon nagkanayon nga daghan silang nakit-ang hinungdan nga dili angayan nga pabalhinon ang mga vendor duha niini mao ang kakuwang sa mga stalls ug ang maong bag-ong merkado diha gitukod kilid sa sapa ug delikado kaayo kini alang sa mga vendors ug sa mga mamalitay.

Iyang giklaro nga ang public hearing nga nahitabo niadtong Oktubre   22, 2003 alang kadto sa katukoran sa maong proyekto ug dili alang sa pagpabalhin sa mga vendor. (BANAT NEWS)