CEBU, Philippines - Naangol ang usa ka lending collector nga mabdos og lima ka buwan human kini gitulis sa duha ka nag-motor nga tulisan samtang nangolekta sa sitio Cornerian sa barangay Poblacion lungsod sa Compostela niadtong Lunes sa alas 5:00 sa hapon.
Ang biktima mao si Fhejellet Robles Vequiso, 30, kolektor sa R.R. Lending Investor nga taga sitio Plaza sa barangay Apas siyudad sa Sugbo samtang wala pa mailhi sa kapolisan ang mga tulisan.
Matud ni PO1 Jomarie Monteciano sa Compostela Police Station dihang nahinabi sa Banat News sakay sa motorsiklo ang biktima nga gimaneho sa usa ka Ricky Espinosa. Sa kalit lang gibabagan sila sa duha ka lalaking nag-motor ug ang angkas mibunot og armas dayong deklarar og tulis, apan si Espinosa gipaarangkada ang motorsiklo aron unta mosibat.
Apan sa pagdagan sa motorsiklo nalagpot ug natagak ang biktima sa karsada, samtang nag-agulo sa kasakit sa iyang bat-ang ang biktima gitionan kini og armas sa mga tulisan ug gibunlot ang shoulder bag niini nga gisudlan sa koleksiyon nga moabot og P20 mil.
Human niini daling misibat ang mga tulisan ug gibiyaan ang biktima samtang si Espinosa mibalik ug gidala kini sa tambalanan ug pagkahuman midangop sa kapolisan. (BANAT NEWS)