4 lalaki nangita sa Buddha nanulis

CEBU, Philippines - Padayon ang kapolisan sa lungsod sa Catmon sa ilang imbestigasyon ug hot-pursuit operation batok sa upat ka mga lalaking mitulis, miposas ug mibaat sa baba sa usa ka lalaki ug mihagbong niini ngadto sa usa ka lungag niadtong Lunes sa alas 10:00 sa buntag sa sitio Labangon, barangay Binungkalan, lungsod sa Catmon.

Base sa report sa TV Patrol Central Visayas si Rommel Arigo, residente sa maong dapit maoy gitulis sa upat ka wala mailhing lalaking nagmotorsiklo nga nangita sa usa ka “Buddha.” Matud pa sa report mokabat sa P1 milyon nga gilangkuban sa P600 mil nga kwarta, usa ka ‘platinum bar’ ug gold nga kwentas ang nadala.

Ang mga tulisan gikatahong nangita sa “Buddha” apan dihang iyang gitubag nga wala siya masayod niini giingong giposasan, gibaatan iyang baba og packaging tape dayon gihulog ngadto sa usa ka lungag.

Si SPO2 Rex Menchavez, duty desk officer sa Catmon Police Station sa pakighinabi niini sa Banat News kagahapon nagkanayon nga aduna nay gilusad nga operasyon ang ilang hepe nga si Inspector Leo Ty batok sa mga gikatahapan.

Niadtong dekada 70 ngadto sa 80 mibaniog og maayo ang gipangitang “Golden Buddha” nga kabahin sa giingong Yamashita treasure nga ‘war loots’ sa Japanese Imperial Army nga gitagoan ni Gen. Tomoyuki Yamashita atol sa ilang pagkapildi sa Ikaduhang Kalibutanong Gubat dinhi sa Pilipinas. (BANAT NEWS)