Pamilya nasampak sa trak usa patay

CEBU, Philippines - Patay ang usa ka maestro ug naangol ang iyang asawa ug 3-anyos nga anak human aksidenting nabangga ang ilang gisakyan nga motorsiklo sa nag-parking nga ekipong kargahanan og aspalto sa highway sa barangay Colon atbang nga bahin sa Korean Electric Power Corporation sa siyudad sa Naga niadtong Domingo sa alas 6:40 sa gabii.

Ang biktima nga namatay samtang gitabang sa mga doktor mao ang nagmaneho sa motorsiklo nga si Mark Carlos Bardos, 25, molupyo sa siyudad sa Lapulapu ug magtutudlo sa AMA College Learning School.

Samtang ang naangol mao ang iyang duha ka angkas nga mao ang iyang asawa nga si Vanessa Bardos, 24, ug ang ilang 3-anyos nga anak lalaki nga si Cyril. Samtang ang gidasmagan niini mao ang trak kolor yellow nga gimaneho ni Edwin Gonzales, taga barangay Yati lungsod sa Liloan.

Matud pa ni PO1 Rongie Nadora sa Naga City Police dihang nahinabi sa Banat News subay sa imbestigasyon ang mga biktima gikan mitambong og party paingon nang mopauli apan wala makabantay sa maong trak nga nag-parking sa karsada.

Ang maong trak gikan kini nagdiskarga og aspalto sa Gate-2 sa KEPCO ug pagkahuman migawas ug gi-parking sa karsada atubangan sa maong kompaniya.

Gihulagway nga ang kangitngit sa maong dapit ang hinungdan nga wala makabantay ang drayber. Si Gonzales sa interbyu sa Buena Mano kagahapon sa buntag nagkanayon nga nag-hazard lights siya niadtong tungura.

Nakugang nalang siya adunay milagapak sa iyang sakyanan maong siya mikanaog ug iyang nakita ang anak sa mga biktima nga nagkamang padulong sa tunga-tunga sa highway maong gidali niya kini og punit.

Siya usab ang midala sa mga biktima sa South General Hospital sa Naga apan dangtan pipila ka minutos nakabsan sa kinabuhi ang lalaking Bardos. (BANAT NEWS)