PO1 Amoren kasuhan gihapon sa CPPO

CEBU, Philippines - Ipadayon sa kapulisan ang pagpasaka og kasong kriminal batok kang PO1 Chona Amoren kinsa aksidenteng nakapusil patay sa iyang bana niadtong Biyernes sa gabii didto sa ilang pinuy-anan sa lungsod sa Cordova.

Si Sr. Supt. Patrocinio Comendador, hepe sa kapulisan sa probinsya nagkanayon ilang ipasaka ang kasong kriminal kun makumpleto na ang mga ebidensya batok kang PO1 Amoren.

Siya mitataw nga bisan kun dili na interesadong mopasaka og kaso ang ginikanan sa napusilan patay nga si Elmar Amoren batok sa policewoman ang kapulisan sa probinsya mopadayon sa ilang imbestigasyon kalabot sa posibling pagsang-at og kasong kriminal.

“This is a public crime and police can file a case if victim’s parents are no longer interested,” pasabot pa ni Comendador.

Ang kapulisan padayong nanguha og dugang ebidensya ug mga saksi sa hitabo nga gikainom niadtong higayona sa biktima ug kinahanglang ilang makuhaan og mga affidavit.

Ang kasong administratiba giduso na ngadto sa Police Regional Office-7.

Tungod sa insidente niadtong Biyernes, si Comendador miawhag kang PO1 Amoren nga mopaubos sa psychological debriefing.

Si PO1 Amoren nadestino sa Operation Branch sa Lapulapu City Police Office ug kasamtangan pang gitanggong sa detention cell sa LCPO.

Siya mitahan ngadto sa kapulisan sa Cordova niadtong Biyernes sa gabii human niya aksidenteng napusilan ang iyang banang si Elmar gumikan sa giingong pagpanapat niini kaniya ug sa ilang 5-anyos nga anak lalaki.

Kagahapon sa hapon gibuhian na si Amoren human sa 36 oras nga wala gayud moluwat og affidavit ang pamilya sa iyang bana. (BANAT NEWS)