Gabii sa Kabilin gihugopan

CEBU, Philippines - Gihugopan sa pagsaksi ang gipasiugdahan “Gabii sa Kabilin” sa dakbayan sa Mandaue nga gipahigayon sa Heritage Plaza sa dakbayan nga milungtad hangtod sa tungang gabii.

Ang maong tinuig nga kalihokan nga gipasiugdahan sa Ramon Aboitiz Foundation Inc. (RAFI) nga giapilan usab sa mga lokal nga kagamhanan, sama sa dakbayan sa Sugbo, lalawigan sa Sugbo ug Simbahang Katoliko.

Ang plaza sa dakbayan sa Mandaue nga nalakip sa sentro sa kalihokan natukod niadtong tuig 1937 nga gikadungan usab niini ang presidencia kon Mandaue City Hall nga mao usab ang nagsilbing katapusang destinasyon sa gatusan ka mga langyaw nga turista nga mihimo sa ilang museum tour dinhi sa Sugbo.

Lakip sa gibisita mao ang Cebu Provincial Museum sa dalan MJ Cuenco Avenue, Plaza Independencia, Magellan’s Cross, Fort San Pedro, Casa Gorordo ug uban pa.

Ang Bantayan sa Hari sa barangay Looc, ug ang nagsinug-ang nga mga karaang gitukod sa panahon sa katigulangang lider nga mga Mandauehanon nga naglakip sa Rizal Bonifacio Memorial Stage, Mandaue City Hall ug National Shrine of Saint Joseph sa barangay Centro sa maong dakbayan maoy giisip nga mga makasaysayanong kabilin sa karaang panahon.

Gilingaw ang mga langyaw nga turista ug mga dumoduong nga misaksi sa kahilokan sa mga maanindot nga awit, sayaw ug uban pa nga gidalit sa mga tinun-an sa Mandaue School for the Arts, gisundan sa audio visual presentation sa San Miguel Corporation, pagluto sa bibingka, masareal, tagaktak ug mapasigarbohon usab nga gipresentar ang Miss Mandaue ug Mr. Mandaue 2011. (BANAT NEWS)