Koordinasyon kinahanglan - Cortes

CEBU, Philippines - Gihangyo ni Mayor Jonas Cortes si 6th District Representative Luigi Quisumbing nga pahibaw-on ang iyang buhatan sa dili pa siya (Quisumbing) mopatuman og mga proyekto sa kabarangayan sa dakbayan.

Matud pa ni Cortes nga gikinahanglan kaayo kini aron may koordinasyon siya ug ang kongresista sa ika-unom nga distrito ug kalikayan nga magkaduble ang ihatag nga proyekto sa usa ka lugar.

Si Mayor Cortes mipasabot nga dili siya buot nga masubli pa ang nasinati nga suliran kaniadto sa panahon pa ni kanhi 6th District Congresswoman Nerissa Soon Ruiz sa dalan R. Colina sa Ibabao Estancia.

Gitataw ni Cortes nga gusto niyang ang ipatumang proyekto ni Quisumbing sa usa ka barangay mahitukma sa master plan sa dakbayan busa mahinungdanong masayod ang iyang buhatan niini.

Hinuon si Kongresista Quisumbing nga nahinabi sa mga tigbalita miingon nga iyang gisuroy ang kinatibuk-ang kabarangayan sa dakbayan ug iyang nakita ang batakang serbisyo nga maoy labing gikinahanglan sa mga molupyo ug maoy gihatagan og dakong pagtagad sa iyang buhatan. (BANAT NEWS)