Namasangil gidunggab angol

CEBU, Philippines - Talandugon ang kahimtang sa usa ka ulitawo kinsa gidunggab sa iyang silingang gipasanginlan niyang mikawat sa iyang kuwarta sa barangay Buagsong, lungsod sa Cordova kagahapon sa kaadlawon.

Ang biktima mao si Ronelio Dacollo Dinoy, 28, ulitawo, nga taga Buagsong, samtang ang suspetsado mao si Cristolio Espra, 37, minyo, nga iyang silingan.

Matud pa ni PO1 Ryan Casiban sa Cordova Police Station nga nasayran nila gikan sa igsoon sa biktima nga si Faustino Dinoy nga nawad-an og kuwarta ang biktima sa sayo pa sulod sa ilang balay.

Sa pagtuo niyang gikawat sa suspetsado, wala siya magpanuko sa pagpanukmat niini hangtod nga nagkalalis sila.

Sa kainit sa ilang lalis wala makaantos ang suspetsado, milanit kini sa iyang kutsilyo ug gihansak sa buko-buko sa biktima.

Diha-diha gihatod dayon   ang biktima sa iyang mga kabanay ngadto sa Vicente Sotto Memorial Medical Center sa dakbayan sa Sugbo.

Samtang ang suspetsado dali kaayong nakasibat ug gipangita na karon sa kapolisan. (BANAT NEWS)