CEBU, Philippines - Nautingkay ang molupyo sa barangay Upper Casili syudad sa Mandaue human adunay upat ka batang lalaki ang giingong miamong-among sa 3-anyos nga batang babaye pasado alas-4 sa miaging hapon.
Sa pakighinabi sa Banat News sa kapitan sa maong barangay nga si Paterno Cabatingan mibutyag kini nga usa sa iyang mga staff ang mipahibalo kaniya sa maong panghitabo.
Matud pa ni Cabatingan nga base sa pasiunang impormasyon nga midangat sa iyang buhatan usa ka residente (pangalan gipugngan sa Banat News) ang nakakita sa mga bata nga diha sa kakahuyan sa maong lugar ug maoy nakakita sa gibuhat nga malaw-ay sa mga bata uban sa 3-anyos nga batang babaye.
Midugang si Cabatingan nga base sa gibutyag kaniya, ang usa sa mga batang lalaki mikabayo na sa 3-anyos samtang ang laing usa ka batang lalaki gikatahong mipaum-om sa iyang kinatawo ug ang laing duha ka bata nagtan-aw.
Butyag usab ni Cabatingan nga iya pang gisubay ang maong report nga gihulagway niyang dakong eskandalo sa iyang barangay.
“Grabe bitaw kaayo ning panghitaboa rare kaayo kay pulos baya mga bata pa kaayo,” pasabot pa ni Cabatingan apan mohimo pa siya og dugang pakisusi sa nahitabo.
Karung adlawa gikatakdang ipatawag ni Cabatingan ang mga ginikanan sa upat ka batang lalaki ug ang 3-anyos nga biktima uban sa nakakita niini.
Midugang usab si Cabatingan nga iya pa usab nga estoryahon ang Department of Social Welfare and Development (DSWD) sa ilang lugar kini aron usab masayod sila kun unsay buhaton sa upat ka bata. (BANAT NEWS)