CEBU, Philippines - Patay ang usa ka drayber sa habalhabal human madasmag sa railing daplin sa karsada didto sa national highway sa barangay Tal-ot sa lungsod sa Barili sa miaging buntag.
Ang biktima mao si Jason Montemayor, 19, ulitawo, nga taga sitio Lantawan sa barangay Malolos sa naasoy’ng lungsod.
Sa imbestigasyon sa kapolisan nasayran nga ang biktima nagsakay sa iyang motorsiklo nga wala pay plate number paingon sa barangay Malolos gikan sa Mantalongon nga naghatod og pasahero.
Apan sa kakusog nga nagpadagan sa iyang motor wala na niya mapiog ang manobela niini ug misukarap siya sa karsada ug didto morumbo sa puthaw nga railing sa daplin sa karsada.
Ang biktima daling gidala sa Barili District Hospital apan gideklarar kining dead on arrival gumikan sa pagkabali-bali sa iyang lawas ug ang pagkapantok sa iyang ulo sa puthaw, samtang ang iyang motorsiklo wala na magkadimao.
Matud ni SPO2 Zaldy Orillo sa Barili Police Station nga duha pa ka buwan ang motorsiklo nga giutang sa biktima ug gihimong habalhabal. (BANAT NEWS)