Kontraktor mitanyag sa ilang tabang

CEBU, Philippines -  Gikalipay ni Gobernadora Gwen Garcia ang suporta nga gipakita sa 9 ka mga contractor alang sa gitinguhang Beautification Project sa Lalawigan ug ingon man sa dakbayan sa Sugbo.

Kini atol sa pagpakigtagbo niya sa maong mga contractor sa Pragmatic Development Construction Corporation, Maningo Enterprises, Rovilla Construction, WTG Construction, Socor Construction Corporation, Barr Steel Construction, OR Sarmiento Construction, Supreme ABF Construction and Construction Supply Company INC. ug Duros Development Corporation.

Lakip sa gipatawag ni Gobernador Garcia mao sila Capitol Consultant Architect Tess Javier ug Provincial Engr. Eulogio Pelayre sa maong panagtagbo.

Natuki sa maong tigum ang pag- angkon sa siyam ka mga contractor sa sidewalk area gikan sa Fuente Osmeña Rotonda paingon sa Provincial Capitol.

Ang serbisyo sa maong mga contractor ilang ihatag sa probinsya sa Sugbo aron labing moanindot ang daplin sa kadalanan sa nahisgutang lugar kay matud pa nila nga ang maong proyekto angayan lamang suportahan kay alang raman kini sa tanan.

Samtang si Javier nagkanayon nga dili lang kay ang daplin sa kadalanan ang panindoton kundili lakip na usab ang center island aron mas limpyo ug angayang tan- awon sa publiko ilabi na sa mga langyaw nga mga turista nga mobisita dinhi sa Sugbo.

Masaligon usab siya nga matapos ang maong proyekto karong Hunyo alang sa pagpangandam sa ika- 442 ka tuig nga anibersaryo sa probinsya sa Sugbo sa buwan sa Agusto.

Si Javier mapasalamaton usab kaayo sa mga contractor kay matud pa niya kung magtinabangay lang ang tanan mas dali rang mahuman ang maong proyekto. (BANAT NEWS)