Priso mi-dive sa selda kritikal

CEBU, Philippines -  Kritikal ang kahimtang sa usa ka piniriso nga misuway sa pagpakamatay pinaagi sa pag-ambak nga nag-una ang ulo ngadto sa sementadong salog sulod sa detention cell sa Tuburan Police Station niadtong Miyerkules sa gabii.

Si Henry Montejo, 34, taga barangay Montealegre anaa karon sa Vicente Sotto Memorial Medical Center (VSMMC) sa dakbayan sa Sugbo human mohubag ang ulo ug gikatahong na-internal hemorrhage   gumikan sa iyang paglayat sulod sa iyang selda.

Si Montejo napasakaan na sa kapolisan og kasong frustrated murder human niya tigbasa ang iyang kumpare niadtong Biyernes sa hapon sa miaging semana didto sa Montealegre.

Matud ni PO1 Eric Diamante sa Tuburan Police Station nga nahinabi sa Banat News  nga niadtong higayona hubog si Montejo nga nakig-inom sa uyoan sa asawa sa biktima.

Ang biktima miadto sa usa ka balay diin nag-inom ang suspetsado ug ang uyoan sa biktima.

Matud ni Diamante nga nagkuyog sila sa pagpa-uli ug nag-una og lakaw ang biktima samtang nagsunod ang suspek.

Apan nakuratan ang biktima dihang   kalit lang gitigbas sa suspek ang iyang batiis hinungdan nga natumba siya ug gitiwasan sa pagtigbas ang iyang liog.

Apan matud ni PO1 Diamante wala maintimano pagkaigo sa liog ang biktima hinungdan nga midagan ang suspek samtang ang biktima gidala sa Tuburan District Hospital.

Si Montejo human sa hitabo nadakpan sa mga tanod ug gi-turn over ngadto sa kapolisan.

Matud ni Diamante niadtong Miyerkules sa gabii nagtan-aw og salida sa telebisyon ang laing lima ka piniriso ug wala makabantay ni Montejo nga misulod sa pansayan ug nagpasumangil nga motubag sa sugo sa lawas.

Human sa pipila ka minutos kalit lang milagubo sulod sa pansayan ug dihang gisusi sa kaubang mga piniriso maoy ilang nakita nga naghapa na si Montejo sa sementadong sawog sa selda.

“Namumo iyang simod kay ni-dive mani siya paglayat mitungtong sa CR,” dugang pa ni PO1 Diamante.

Matud ni Diamante nga nakonsensya kuno si Montejo nga gitigbas niya ang iyang kompare kay wala gyud sila magkaengkuwentro ug tungod lang sa ilang panaglalis gumikan sa iyang kahubog iyang natigbasan ang biktima. (BANAT NEWS)