CEBU, Philippines - Ang kapolisan mopahigayon og adopt a classroom o mopanindot sa usa ka lawak saringan aron nga hamugaway kini sa mga estudyante nga magklase diin ang maong proyekto ubos sa direktiba sa Provincial Police Director, Senior Superintendent Patrocinio Comendador matud ni Chief Inspector Eddie Recamara, officer-in-charge sa Talisay City Police Station.
Si Recamara nga nahinabi sa Banat News kagahapon nagkanayon nga magpili sila og usa ka classroom sa usa ka tunghaan nga ilang paninduton apan ang TCPS mi-sponsor og duha ka classroom diha sa Linao Elementary School ug Mohon Elementary School.
Matud niya nga duna na siya’y gidestinong mga polis nga mosusi sa mga panginahanglan sa duha ka mga classroom nga ilang napilian.
Ang laing direktiba ni Comendador mao nga ang kapolisan mo-coordinate sa mga prinsipal sa tunghaan ug opisyal sa kabarangayan alang sa higpit nga seguridad sa mga estudyante sa pagbukas na sa klase.
Kabahin sa higpit nga seguridad tulo ka mga pamaagi ang gigama sa TCPS nga mao ang pro-active effort, pre-emptive effort ug police community relation. Gipasabot sa OIC nga ang pro-active effort duna siya’y ipang-deploy nga mobile patrol nga magpatrolya diha sa mga tunghaan ug ngadto sa ubang mga lugar tungod kay dili lang sa tunghaan usab sila i-sentro sa pagbantay.
Gawas sa mobile patrol dunay beat patrol usab ang ipang-deploy nga magmando sa trapiko ug magbantay diha sa mga gate sa tunghaan uban sa mga tanod panahon sa buntag sa pagsulod sa mga estudyante sa klase ug sa hapon sa pagpanggawas.
Sa pre-emptive effort sentrohon nila ang mga lugar diin magpundo o gihimong tagoanan sa mga badlongon o nakahimo og kalapasan sa balaod ug mopahigayon sila og mga saturation drive ngadto sa maong mga lugar aron masikop ang maong mga badlongon ug dili na makagama pa og laing krimen.
Kabahin sa police community relation usa sa naglangkub niini mao ang adopt a classroom, sunod ang information drive ngadto sa mga tunghaan aron ang mga estudyante malikay sa ginadiling drugas, sa mga kiriwan sama sa mga manglabnihay og cellphone ug sa mga dili maayong grupo sama sa mga gang o fraternity.
Gawas niini aron usab makabantay ang publiko nga dili mabiktima sa pagpanglungkab tungod kay dunay posibilidad nga mabiyaan ang kabalayan panahon sa pagbukas sa klase tungod kay ang mga bata tua na sa tunghaan ug ang ubang mga ginikanan mohatud sa ilang mga anak ngadto sa tunghaan ug ang uban tua sa ilang mga trabaho. (BANAT NEWS)