CEBU, Philippines - Maayong pagkaputol sa walang paa sa usa ka lalaki human kini makuryentihi ug namatay samtang nag-ayo sa antenna sa telebisyon sa ilang balay pasado alas- 10 kagahapon sa buntag sa barangay Bonbon lungsod sa Oslob.
Ang biktima nailhan nga si Joel Anthony Mirallo Laurente, 22, taga barangay Poblacion sa maong lungsod.
Sa pakighinabi sa Banat News ni PO2 Rey Angelo Agustin, sa Oslob Police Station kini misaysay nga ang biktima uban sa iyang kapuyo nga si Babybren Figarum nagkalingaw og tan-aw og telebisyon dihang kalit nga mikarat-karat ang reception.
Hinungdan nga gibalhin sa biktima ang antenna nga nahimutang sa likod nga bahin sa ilang panimalay ngadto sa atubangan nga bahin ug gikatkat ang mansanitas aron didto kini ikabit.
Matud pa ni Agustin samtang giayo ang antenna gisipitan ni Laurente sa iyang walang paa ang tukod nga tubo aron dili malihok.
Apan wala damha sa biktima nga ang antenna nga iyang gi-ayo nasandig sa mainline sa Cebu Electric Cooperative (CEBECO) 2 nga miresulta sa iyang pagkirig.
Matud pa ni Agustin tungod sa gikusgon sa boltahe sa kuryente nga milatay sa lawas sa biktima kalit lang nga naputol ang gisipit niining paa ug nahulog sa ubos samtang ang iyang lawas nabitay sa mansanitas.
Ang kapuyo niini mao nay daling mitawag sa kapolisan apan dangtan og pipila ka gutlo giingong natagak ra ang lawas niini sa ubos.
Gihulagway ni Agustin nga hilabihan kagrabe ang pagkasunog sa lawas sa biktima ug luspad usab kini. (EIM) (BANAT NEWS)