Hinabang sa gidemolis itunol karon

CEBU, Philippines -  Gikatakdang ipang-apod na ugmang adlawa ang gisaad nila ni Kongresista Tomas Osmeña sa habagatang distrito ug Kongresista Cutie del Mar sa amihanang distrito alang sa mga naapektohan sa demolisyon sa Mahiga creek.

Si Osmeña mohatag og financial assistance nga P5,000 ug  P3,000 usab gikan sa buhatan ni del Mar.

Gipadayag ni Osmeña nga angayan nga tabangan ang mga tawo naapektohan sa demolisyon sanglit mga residente man usab kini sa siyudad.

Kahinumduman nga gikauwaw ni Osmeña si Mayor Michael Rama nga iyang gihulagway nga wala’y pagpakabana sa mga kabus tungod sa baruganan niining padayon nga pagpaguba sa mga balay duol sa Mahiga Creek nga walay gitagana nga relocation site ug cash assistance.

Wala mahimuot ang kongresista kang mayor gumikan kay wala gyud kini motuman sa prinsipyo sa ilang partido nga Bando Osmeña Pundok Kauswagan (BOPK).

Apan una nga gipadayag ni Rama nga duna sila’y ihatag nga relocation site apan iya gihapon nga gibarugan nga dili siya mohatag og cash assistance.

Usa sa gisugyot apan nagpaabot pa og tubag gikan kang Gob. Gwendolyn Garcia ang 93-1 Lot sa lalawigan dinhi sa sulod sa dakbayan.

Kahinumduman nga ang mga residente sa Mahiga Creek misang-at og pormal nga reklamo batok kang Rama sa Ombudsman for the Visayas gumikan kay matud pa dili makatarunganon ang pagguba sa ilang mga panimalay.

Kasamtangang giasikaso karon sa Department for the Welfare of the Urban Poor (DWUP ) ang maong suliran kung diin mihimo na usab sila og pakisusi sa karon sa 70 ka mga luna sa siyudad nga posibleng maoy mga pilianan alang sa relocation site. (BANAT NEWS)