Pasilidad sa public schools sa Talisay kuwang

CEBU, Philippines -  Ang Talisay City Department of Education (DepEd) Division padayon sa ilang pakisusi sa hinungdan nganong ubos ang nakuhang score sa ilang mga estudyante sa gipahigayong national ug regional nga pasulit.

Si Woodrow Denuyo, Talisay City Division Superintendent nga nahinabi sa Banat News mibutyag nga usa sa ilang gisusing hinungdan mao ang kakulang sa mga pansayan.

Matud pang Denuyo ang bata nga mogawas aron pagtubag sa sugo sa lawas dugay kaayong makabalik ug ang uban modiretso og pauli ug laayon na pagbalik alang sa ilang leksyon. Gawas niini dunay posibilidad usab nga ang bata mopauli sa ilang balay ug laayan nang mobalik sa klase.

Matud ni Denuyo nga gipaningkamutan nila nga mabutangan gyud og mga pansayan ang tanang mga classroom sa mga eskwelahan sa Talisay.

Gibutyag usab niya nga kulang gyud ang ilang lawak saringan karon, butang nga mao say giyangungo sa tanang pampublikong tunghaan sa nasud karong hapit na ang pag-abli sa klase.

Ang Talisay dunay 24 ka mga tunghaan sa elementarya ug 18 sa high schools. Apan sa matag bukas sa klase nagkadaghan ang mga estudyante.

Sa pagkakaron ang matag lawak karon adunay kapin ug kulang 60 ka mga estudyante imbes nga 45. Ug kung maghinobra na gyud gibuak nalang ang klase sa duha ka shifts sa hapon ug sa buntag.

Gawas pa niini kuwang usab ang 1,000 ka magtutudlo sa Talisay ug 180 niini mga Teacher Aid Volunteers nga gisweldohan sa lokal nga kagamhanan. (BANAT NEWS)