CEBU, Philippines - Miumol na og fact finding team ang Department of Interior and Local Government (DILG)7 nga maoy tahasan pagsusi kon may kalapasan ba si Mayor Michael Rama pagpaguba sa mga balay sa daplin sa Mahiga Creek.
Si DILG-7 Regional director Pedro Noval miluwat og memorandum kagahapon sa buntag nga nagtudlo kang Cebu City DILG Director Patricio Gabuya nga maoy mangulo sa fact finding team ug ang mga staff niini maoy magsilbi niyang mga sakop.
Agi usab kini og pagsanong sa kamanduan ni DILG Secretary Jessie Robredo ngadfto kang director Noval nga mohimo og pakisusi sa nahitabong pagpa-demolish sa mga molupyo sa Mahiga creek nga nangreklamo tungod kay walay relocation site nga gipaangay ang siyudad ingon man way hinabang pinansiyal nga gihatag.
Gibutyag ni Noval sa Banat News hangtud lang karung alas 5:00 sa hapon ang tagal nga iyang gihatag sa fact finding team pagsumiter sa resulta sa gihimong pakisusi ning maong problema.
Ang madawat unya niya nga resulta sa pakisusi sa fact finding team maoy basihan usab ni director Noval sa iyang iduso nga report ngadto kang Robredo.
Matud ni Noval nga sentro sa tutokang isyu mao ang posibling kalapasan ni Rama sa Urban Development and Housing Act (UDHA) Law sa pagpatuman sa nahisgutang demolisyon.
Ang mga apektadong pamilya midangop sa DILG kay wala sila makauyon sa lakang sa mayor sa pagpangguba sa ilang kabalayan samtang wala sila hatagi og relocation site ug pagkaon.
Hinoon si Kongresista Tomas Osmena nga mibisita sa mga apektadong pamilya kauban ang pipila ka mga konsehal sa dakbayan mipasalig nga hatagan niya og tag P5 mil ang matag pamilya.
Ang mga apektadong pamilya inabagan sa Pagtambayayong Foundation Inc., una nang mipasaka og kasong kriminal ug administratiba sa Ombudsman Visayas batok kang Rama, hepe sa SPEED nga si Noel Artis ug uban pa. (BANAT NEWS)