Suspek pagpatay sa mag-agaw sikop

CEBU, Philippines -    Ang suspetsado sa pag-salvage sa manag-agaw nga Parawan niadtong Huwebes Santo sa miaging buwan nadakpan sa kapolisan didto sa pinuy-anan niini sa sitio Pungtod, Alaska- Mambaling   sa miaging hapon.

 Si Orlando Mejares, 49, minyo alyas ‘Bogart’ manauray og buwang, nakuhaan og usa ka bultong shabu atol sa buy bust operation sa City Intelligence Branch (CIB) sa Cebu City Police Office (CCPO).

Si Mejares maoy usa sa gitumbok sa usa ka saksi nga midagit ug mipatay ni Glenn Parawan, 32, ug sa iyang ig-agaw’ng 17-anyos nga taga barangay Maslog , dakbayan sa Danao, niadtong Huwebes Santo samtang nagbarog-barog atubangan sa dakong department store sa uptown area dakbayan sa Sugbo.

Ang manag-agaw’ng Parawan napalgang patay na nga gilabay sa daplin sa dalan sa barangay Cantipla nga gisulod og sako kansang mga lawas nabulit sa tinigbasan ug dinunggaban ug ang mga baba pulos gibaatan og packaging tape. Kagahapon sa buntag ang kapolisan nga gipangulohan ni Sr. Supt. Patrocinio Comendador uban ni Chief Insp. Romeo Santander mihimo og re-enactment didto sa uptown area hangtud na didto sa usa ka poultry farm   sa barangay Malubog diin dad-a ang duha ka biktima ug didto ligira og bunal sa wala pa kini patya.

Matud ni Gualberto Librando nga taga Basak , dakbayan sa Sugbo kinsa nadakpan sa kapolisan tungod sa paghupot og armas nga walay lisensya mitug-an kang Buenafe nga niadtong Huwebes Santo sa buntag gitawagan siya sa igsuong babaye ni Llagono nga paguwardiyahon sa balay niini.

Midugang si Librando nga samtang didto siya sa balay sa pamilyang Llagono may lalaking mihangyo kaniya nga pakuyogon ngadto sa Robinson Department Store.

Si Librando miingon nga didto na siya makaila sa mga ginganlan og Alladin, Bogart, Allan Sanchez ug  ang drayber nga ginganlan lang og Jay-R.

Matud ni Buenafe nga giduol sa grupo ni Alladin ang duha ka biktima ug gisultihan nga dunay usa ka Colonel   nga makig-istorya kanila hinungdan nga mikuyog ang duha ka biktima.

Nianang pagkahapon gidala nila ang mga biktima sakay sa usa ka sakyanan paingon ngadto sa Farm sa barangay Malubog.

Matud ni Librando sa ilang pag-abot didto sa usa ka umahan, ang duha ka biktima gipalingkod sa bangko ug gisukit-sukit apan tungod kay walay ikatug-an ang mga biktima giposposan nila ni Alladin ug Bogart og dos-por-dos nga kahoy ug ‘pala’ ang ulo sa mga biktima hangtud nga kini nalup-og sa yuta.

Ang duha nga buhi pa niadtong higayona, gipabangon ug gipalingkod og balik sa bangko sulod sa manokan.

Matud sa saksi nga iyang nakita nga gidunggab sa icepick ni Alladin ang mga biktima dayon ang buwang sa manok mao nay gigamit usab ni Bogart sa pagdunggab ngadto sa mga biktima.

Si Librando mitataw nga wala na siya motan-aw ug milakaw siya paingon sa karsada agi sa sapa ug nagpaabot nga adunay sakyanan nga moagi aron siya makasakay paingon sa Malubog.

Matud ni Librando niadto pa untang bag-ohay pa ang hitabo siya mosulti sa kapolisan apan tungod sa iyang kahadlok wala niya kini mabuhat.

Iyang gitug-an karon ang tanan tungod kay nakonsiyensya na siya sa gibuhat sa mga suspetsado ngadto sa duha ka biktima.

Si Librando ug Sanchez sakop sa Barangay Intelligence Network (BIN) ug aktibo sila sa kalihokan sa kapolisan.

Si Mejares hugtanong mihimakak nga siya nakuhaan og shabu sa kapolisan sanglit natulog siya sa ilang balay sa dihang misulod ang kapolisan.

Labaw nang gipanghimakak ni Mejares nga may kalambigitan siya sa pagpatay sa manag-agaw’ng Parawan.

Si Buenafe nagtuo nga dako ang kahigayonan nga masulbad na ang kaso sa manag-agaw’ng Parawan sanglit ang usa sa mga suspetsado mi-cooperate kanila ug mibutyag kun giunsa pagpatay ang mga biktima. (BANAT NEWS)